VC term pawhtawi avanga AMVCA ten sawrkar khinna ah Mizoram sawrkar in thiam a chang
Mizoram-a Village Council dinglai te term sawrkar in a pawhtawi avanga All Mizoram Village Council Association (AMVCA) ten an President hminga Mizoram sawrkar an khinna ah Court chuan nimin khan thutlukna puangin Mizoram sawrkar chuan thiam a chang.
Gauhati High Court Aizawl Bench chuan Mizoram sawrkarin Mizoram District 9-a VC dinglai te term thla 6-a a pawhtawi avanga All Mizoram Village Council Association (AMVCA) ten an President hminga an khinna chu a ngaihtuah hnuah nimin khan thutlukna puangin Court chuan Mizoram sawrkar chu thiam a chantir a. Hemi chungchanga Court thutlukna ang chuan, VC term pawhtawi chungchangah, VC Act 2014 amendment angin sawrkar chuan VC term chu thla 18 aia tam loin a pawt tawi in a pawtsei thei tih a sawi a, sawrkar thutlukna ah Dan kalh a awm lo niin a sawi a. Hei bakah hian VC inthlan tih hma chhana sawrkar insawifiahna anga, sawrkar laipui atanga Post Devolution Revenue Deficit Grants hmuh thin tlem tial tial tur avanga sum lam harsatna awm thei leh Mizoram chuan sawrkar kum tharah inthlanna dang, Autonomous District Council inthlan leh AMC inthlan a hmachhawn dawn bawk avangin sum harsatna awm thei pumpelh nan VC term chu pawt tawiin, tun sawrkar kum chhunga inthlang turin a ruahman ta tih Mizoram sawrkarin a sawi chu thu tlingah a ngai tih High Court chuan a tarlang bawk.
Tarlan tawh thin angin AMVCA hian an President K. Lalngaizuala hmingin nikum November ni 21-a sawrkar VC term thla 6-a a pawh tawina Order an khing a. Thubuai hi a tirah sawrkar order hmasa khinna a nih avangin AMVCA hian hnuk kirin sawrkar order hnuhnung zawk khinna tur an thehlut leh a. Hemi chungchang ngaihtuah hun tura ruahman a nih hnu kumin January ni 13 khan AMVCA chu dan ang thlap register an nih loh avangin an Ukil te thurawn angin hemi ni vek hian an inhnukdawk leh a. A tuk, January ni 14, 2025 khan thubuai hi an President hmingin an thehlut leh a. A tuk ni 15 khan High Court chuan sawrkar chu insawifiah turin a ti a. Sawrkar chuan insawifiahna thehlutin January 30-a thubuai ngaihtuah leh a nih hnuah insawifiahna chiang zawka thehlut tura tiin hei hi sawrkar in a thehluh leh hnuah thutlukna a siam ta a ni.