Vawiin-ah VC Inthlanpui neih tur niin Zanin-ah Vote tla te chhiar nghal tur a ni ang
Serchhip District chhunga Village Council hrang hranga inthlanna nei turin inbuatsaihna peihfel a ni tawh a, nimin chawhma lam khan Serchhip District Election Officer Paul L Khuma hovin VC inthlannaa hman tur Ballot Paper dahna Strong Room chu a him tawk em tih endik a nih hnuah Political Party aiawhte leh Official te hmaah hawn a ni a, hemi hnu hian Serchhip DC Office tualzawl atangin Election material thawnchhuahna neih chhunzawm nghal a ni a. Polling Party te chuan nimin nileng khan an mamawh te DC Office-ah hian an lam khawm a. Hemi hnu hian an duty-na atana an mamawh hmanraw kimchang te nen an duty na hmun tur panin an chhuak a, nizan khan Pollling Station-ah riaklutin tukin dar 7:00 atang hian Vote thlak tan tur a ni ang.
Village Council Inthlanna atan hian Ballot Paper hman tur niin zing dar 7:00 atangin VC area hrang hranga Vote thlakna tur hmun ruahman ah te Vote hi thlak tur a ni anga, ruahman ang chuan tlai dar 4:00 thleng vote thlakna hun hawn a ni dawn a, huntiam chhunga vote thlak hman lo, Polling Station huamchhung thleng hman si te tan erawh vote a thlak chhunzawm theih a ni dawn a. Vote tla te hi zanin dar 7:00 atangin a rualin chhiar nghal a ni anga, zan dar 7:00 a vote thlak la zawh lohna Polling Station-a vote tla te chu Vote thlak zawh veleh chhiar nghal a ni dawn bawk a ni.
Mizoram State Election Commissioner Dr. H. Lalthlangliana chuan Village Council leh Local Council inthlanpui neih tur atan inpuahchahna peihfel a nih tawh thu sawiin, mipuite vote thlak theuh turin a sawm a, Democracy chu mi zawng zawng mi lian leh mi te inang tlanga sawrkar an siam theihna awmchhun a ni tih sawiin, Vote thlak vek turin mipuite a sawm a ni. State Election Commissioner chuan VC leh LC inthlanpui neih turah harsatna lian tham tawk loin tluang taka inthlan nei turin inpuahchah fel a ni tawh tih a sawi a ni.
Village Council inthlan turah hian District pakua-a VC 544-ah Seat 3894 a Member turte thlan an ni dawn a, heng zinga Seat 982 chu hmeichhe tana hauh a ni a, VC-ah hian Candidate 6829 an awm a ni. Aizawl Municipal Corporation leh Lunglei Municipal Council huamchhung Local Council 111-a seat 723-ah Candidate 2076 an awm a, hmeichhe tana hauh seat 195 a awm bawk a ni. State Election Commision ruahman angin Vawiin-a VC leh LC inthlanna neih tur buaipuitu tur atan sawrkar mi leh sa, an vaiin mi 7683 ruahman an ni a, hengte hi Election Official-ah mi 5290, Security-ah mi 1077, VLO/BLO-ah mi 975 leh Requisition Staff 341 an ni.