Hualtu kawng danpin titawp

Serchhip District-a Chhingchhip khua chuan an khaw tuilakna tihchhiat thin a nih avanga lung-awilohna lantirin nimin khan Hualtu khaw panna kawng an dang a, khaw pahnih aiawhte hian in-biakna an neih hnuah nimin tlai dar 5:00 khan he kawng dan hi tihtawp a ni.
Thudawn danin Chhingchhip khua hian Hualtu ram, an khua atanga km 13 vela hla atangin Gravity hmangin tui hi an la a, tui lakna atan hian Thir Pipe hmangin hei hi tum engemaw zat tihchhiat a nih tawh a. Chhing-chhip Thalaite chuan thuchhuah siamin, kum 2020 khan Hualtu khua ah Magistrate-te leh sawrkar hotute pawh kalin, inbiakna neih a nih tawh thu leh he mi hnuah pawh hian vawi tam tak tui pipe hi ruk bo a nih leh avangin thuneitu sang zawkah thlen leh a nih bakah Chhingchhip khua in hnatlang leh sum sengin vawi tam tak siam that hna thawh a ni leh tawh tih an sawi.

Hetihlai hian tunkar Thawhtanni, Feb. 10, 2025 khan Tui pipe 7 vel a bo tih hriatchhuah leh a nih thu Chhingchhip Thalai thuchhuah chuan sawiin, hei vang hian Hualtu khua hian tui pipe bo an zawn hmuh saka, a chhe lai an siamthat sak leh hma loh chuan nimin zing dar 6:00 atang khan tiamchin awm lovin Hualtu khaw kawng hi an dang a, School naupang leh damlo emergency te chu huam lovin kawngpui dang tur hian mi 70 vel zet an thawk-chhuak a, Chhingchhip Mualpui atanga Hualtu kaw panna peng-ah kawngpui hi an dang a ni.

Hetianga Hualtu panna kawng dan a nih avang hian Serchhip atangin Thenzawl SDO (Civil) K. Lalhlimpuia leh Police hotute chu a hmunah an kal nghal a, kawng dangtute leh Hualtu khua te hian inbiakna neiinbawhzui tura thu dah 6 neiin inremna an siam a, hemi ang hian kawng dan chu nizan dar 6:00 khan an titawp ta a ni. Heng khaw pahnih aiawh ten thu an dah zingah hian Tuilak hnar Catchment Area siam dan tur ruahman te; Tuikawng pipeline rubotu hi tun thla ni 18 hmaa Hualtu VC ten zawngchhuak tur leh Pipe bo thu ah ngaihdam dilna thuchhuah siam te a tel a ni.