V-Day pualin thisen pek a ni

Nimin February 14, 2025 khan Valentine’s Day pualin Mizoram hmun hrang hrangah damlo a mamawhte tan a thlawna thisen pekna hun hman leh a ni a, hmun hrang hrangah thisen Unit 663 pek a ni.

Valentine’s Day puala thisen pek runpui hi Association for Voluntary Blood Donation (AVBD) buatsaih niin Aizawl-ah chuan Dawrpui Multipurpose Hall-ah neih a ni a, hun kaihruaitu AVBD President C. Lalnunema chuan kum 2010 atangin Valentines Day Blood Donation Camp hi kumtin huaihawt a ni tih sawiin, kum 15 chhungin thisen unit 10,958 pek a ni tawh tih thu a sawi.

He hunah hian National Health Mission (NHM) Mission Director Dr. Eric Zomawia chu khuallian a ni a, Thisen pek kawngah hmarchhak State zingah Mizoram chu titha pawl a ni tih sawiin, kum 2011 leh 2013-a MSACS-in hmarchhak State puala thisen pek chungchang zir hova intawhkhawmna an buatsaih atang khan Sikkim, Arunachal Pradesh, Meghalaya leh Nagaland te pawhin nasa takin hma an sawn ve phah thu a sawi bawk.

Dawrpui Multipurpose Hall-a thisen pekna ah hian Civil Hospital Aizawl Blood Bank tan thisen unit 304 pek a ni a, ZMCH Falkawn-ah Unit 86 pek niin Synod Hospital-ah Unit 12 pek a ni bawk a, Lunglei-ah Unit 101 pek niin Champhai-ah Unit 42 pek a ni a, Kolasib-ah Unit 78 pek a nih bakah Siaha-ah Unit 40 pek a ni bawk.