Thangram in Mizoram-a beh an duh thu an sawi

Thangram Indigenous Peoples' Movement (TIPM) hruaitute chuan Assam-a Karimganj District chhunga an chenna ram mel 180 bial chu Assam atanga satthla a Mizorama beh an duh thu an sawi.

TIPM hruaitu K. Vana Chorei chuan tun-hnai khan Mizoram Chief Minister Lalduhoma rawn hmu-in Mizorama beh a duhna kawngah a tanpuina an dil tih a sawi a. Chief Minister pawhin a puihna an mamawhna-ah chuan theihtawp chhuahpui a lo tiam niin a sawi a. Hmakhawsang atanga Mizote'n an lo luah tawh Thangram bial-ah Mizo 32,000 bawr vel an awm niin a sawi a ni. An chenna Bial-ah hian Mizo hnam hrang hrang - Hrangkhawl, Sakachep, Molsom, Chorei leh Ranglong te an awm thu sawiin, an luah chin ram mel 180 bial ni thin kha tunah chuan an vela hnam lian zawkte'n an nek nasat avangin mel 140 bial vel chauh a nih tawh a rin thu a sawi a. An hnam ziarang leh sakhaw him zawk nan Mizoram a beh chu tih makmawh a nih thu leh hemi chungchangah hian Prime Minister hnenah lehkha thehlut tawhin Assam sawrkar hruaitute nen pawh vawi duai lo an inbe tawh niin a sawi bawk a ni.

TIPM hruaitu K. Vana Chorei chuan British ho khan 'Old Kuki' ti a an vuah thu pawh a sawi a, hriat hlat theih berah kum 1490 khan helai hmunah hian Mizote hi an lo inbengbel tawh niin a sawi bawk a. Mizoram-a beh an duh thu hi kum 2020 atang khan nasa takin an lo aupui tawh niin a sawi bawk

Comments