Sawrkar apiangin VC-te an duh huna an namthlu zel thei dawn ta hi pawi kan ti - President, AMVCA

Mizoram Village Council Association President K.Lalngaizuala chuan, “Mipui rorelna bulthut, VC-te sawrkar apiangin an duh huna an namthlu zel thei dawn ta hi pawi kan tih ber a ni,” a ti.

Inrinni-a Aizawl Press Club-a thuthar thehdarhtute a kawmna ah AMVCA President K. Lalngaizuala chuan Mizoram sawrkarin VC term ding lai thla ruk chuang zeta a pawh tawina thupek, All Mizoram Village Council Association aiawha High Court-a an khinnaah hnehna an chang zo ta lo tih sawiin, “Sawrkarin VC-te a thuneihna min lek khuma kan term ding lai min pawh tawisak dawn hian sawrkar hian a chhan leh vang engmah a sawi lo a, keini VC ding laite min rawn derna emaw, mipui aiawhte rawnna emaw, political party dangte biak rawnna emaw pawh engmah a awm lo,” a ti a. “VC-te hian sawrkarin tih tur min tuk apiang, mipuite tan theihtawp chhuaha kan thawh reng laiin sawrkar thawhpui duh lo anga sawrkar hotute min puhnate khan kan rilru a tina a. Sawrkar ding laiin VC term pawt tawia a hun hmaa inthlanna buatsaih a tum tlang ta hi party dang VC-te min dah bo thuai thuai tumna leh ruling party sawhngheh tumna liau liau a ni tih a lan avangin, mipui thlan VC-te zahawmna vawng hima democracy ropuina venhim tumin dan rorelna, High Court kawngkhar kan kik ta a ni,” a ti. 

Sawrkarin an term a pawhtawi chhan chu pawm har an tih thu sawiin AMVCA President chuan, “VC ding laite min namthluk chhan leh a hun hmaa inthlanna min neih luihpui chhan ber nia Mizoram sawrkar dinglaiin Court-a a sawi chu 15th Finance Commission atanga Mizoram sawrkarin Post Devolution Revenue Deficit Grant (PDRDG) a hmuh tlakhniam zel vang a ni tih a ni a, hei hi pawm a harsa hle a. PDRDG a tlakhniam zel rual hian 15th Finance Commission atanga Mizoram in sum a hmuhna dang, Share of Taxes, Rural Local Body Grant, Urban Local Body Grant leh State Disaster Risk Management Fund hnuaia sum hmuhte chu a pung zel thung a. Sawrkar kum kal laia sum hmuh tur chhut lawk aia sawrkar kum thara sum hmuh tur chhut lawk a tam zawk daih laia a hun taka inthlanna buatsaih theih loh chhan chhuanlama sum hmuhna head pakhat tlahniam awmchhun chhuanlama hman hi a pawmawm loh hle a ni,” a ti.

AMVCA President chuan Mizoram sawrkarin VC term dinglai pawt tawia inthlanna min neih luihpui tur chungchangah hian Dan hnuaiah hnehna chang mahse, mipui thinlungah erawh hnehna an chang chuang lova an hriat thu sawiin, “Kan tum ber, VC te hi mipuite thlan, mipui rorelna bulthut kan ni tih mipuite hriat thar tir kawngah kan hlawhtling thovin kan inhria a, mipui thlante zahawmna venhim tuma kan beihnaah min thlawptu leh min duhsaktu zawng zawngte chungah AMVCA aiawhin lawmthu ka sawi a ni,” a ti bawk.