MZU-a Zirtirtu pakhat thawk zui tlak ah ngai lo

Zonuna Kawlni (LENKAWL) • February 6, 2025 • Comments • Mizoram

Mizo Zirlai Pawl (MZP) chuan Mizoram University (MZU) Economics Department-a Zirtirtu pakhat chu thawk reng tlak ah an ngaih loh thu an sawi.

MZP hruaitute hian MZU Economics Department-a zirtirtu chungchangah zirlai atanga complain an dawn avangin nimin khan MZU Vice Chancellor Prof. Debakar Chandra Deka chu an hmu a, MZP chuan Dr. Akshaya Kumar Mohanty, Associate Professor, Dept. of Economics; MZU laka zirlaite atanga complain an dawn bawhzuiin MZU Vice Chancellor hi a pisa-ah an hmu tih sawiin, zirlaite harsatna thlenna hmun, Students Grievance Redressal Committee (SGRC), MZU-in hmalâkna report an la nei lo chu hriatthiam har an ti hlê tih sawiin, a rang thei ang bera Dr. Askhay hian a phu tawk hremna a hmuh ngei theihna turin hma la turin an ngen nghal bawk a. February 2025 chhung ngeia hmalakna a awm lo a nih chuan na takin MZP hma an lak chhunzawm tur thu an sawi bawk.

MZP chuan Dr. Akshay Kumar-a chung-changa June 16, 2024 daih tawha MZU Registrar kaltlanga zirlai 20 chuangin complaint an thehluh bawhzuina report engmah la awm loh mai bakah, zirlai tam tak amah avanga rilru lama harsatna tawk hial leh kutthlak hial a neih thute an hriatin an rilru a ti na hle tih an sawi a. “Hetiang zirtirtu hi MZU a thawk reng tlakah kan ngai lo. Zirlaite hmakhua ngaiin VC hi a rang thei ang bera hma lo la ngei turin kan ngenin kan hriattir nghal a ni,” an ti bawk.