Mizoram-a natna thihpui tam ber Cancer la ni

Mizoram-a mihring thih chhan tam ber chu Cancer a la ni reng a, kum 6 chhungin Cancer avangin mi 6,745 an thi nia chhinchhiah a ni.

Health & Family Welfare Department hnuaia National Programme for Prevention & Control of Cancer, Diabetes, Cardiovascular Diseases & Stroke (NPCDCS) hotute'n an sawi danin kum 2018 atanga kum 2023 thleng khan Mizoram-ah Cancer vangin mi 6,745 an thi a. Mizoram a Cancer natna tam chhan hi nunphung tha lo, a bikin vaihlo leh a kaihhnawih khawih an tam vang niin an sawi bawk a ni. Chhinchhiahna atanga a lan danin kum 2018 khan Cancer vangin mi 995 an thi a, kum 2019-ah mi 1,081 an thi leh a, kum 2020 khan mi 1,100 thiin kum 2021 khan mi 1,138 an thi leh bawk a, mkum 2022 khan mi 1,131 thiin kum 2023 khan mi 1,300 vel an thi bawk a. Nikuma thi zat hi hriat chian theih a la nih loh thu an sawi thung.

Kum 2018 leh 2023 inkar chhung vek hian Mizoram State Cancer Institute (MSCI)-ah Cancer vei mi 11,569 an inziaklut tawh niin MSCI Director Dr. Jerry L. Pautu chuan a sawi a. Kum 2023 kha hemi kum 6 chhunga Cancer vei inziaklut tam ber kum a ni a, mi 2,100 an inziaklut a ni. Hei hi kum 2022 khan dawtin mi 2,071 an inziaklut a, kum 2021 khan mi 2,013 chhinchhiah an ni bawk. Kum 2018 khan Cancer vei thar mi 1,770 chu MSCI-ah chhinchhiah an ni a, kum 2019-ah mi 1,767, leh kum 2020-ah mi 1,848 ziahluh an ni bawk.

Dr. Jerry L. Pautu chuan kumtinin Cancer vanga thi hi an pung reng chungin inenkawlna tha leh changkang hman a nih chhoh zel avangin Cancer veite hi tunhma ngaihtuah chuan an dam rei tawh hle niin a sawi a. Kum khata Cancer vanga thi an tam rual hian tam tak chu kum rei tak lo vei tawhte an nih thu a sawi a. Cancer vei hmuhchhuah hma pawimawhna sawiin, enkawl dam a awlsam bik tih a sawi a, helama tanlak nasat a ngai nia a hriat thu a sawi bawk.

MSCI-ah hian February ni 4, 1998 khan Cancer hemna khawl 'Cobalt Therapy Unit' bun a ni a, hma sawn chho zelin nikum February ni 4 khan MSCI chu Tertiary Care Cancer Centre (TCCC)-ah hlankai a ni a. Japan international Cooperation Agency (JICA) sum cheng vbc. 732 hmanga nasa taka thuamthat a ni bawk.