Larsap hovin 'Pariksha Pe Charcha' lo chhim a ni

Prime Minister Narendra Modi hova awmze nei zawka exam hmachhawn tura pawimawhte sawia titi hona, 'Pariksha Pe Charcha (PPC)' tum 8-na chu nimin khan Delhi-a Sunder Nursery-ah neih a ni a, he hun hi Mizoram atangin Governor Gen. (Dr) Vijay Kumar Singh hovin Video Conference hmanga lo chhim a ni.

He program hi exam hmachhawn mai tur zirlaite bakah nu leh pa leh zirtirtute tana ruahman niin, kumin hi a tum 8-na a ni a, he hunah hian mi vbc. 5 chuang tela chhut niin an tam ber tum a ni a. Mizorama zirlaite, nu leh pate, zirtirtute leh School Education Official-te pawhin he hun hi Governor hovin SCERT Auditorium & Conference Hall, Chaltlang atangin Video Conference kaltlangin an chhim a. Program zawh hnu hian Governor chuan zirlaite kawmin exam hmachhawn kawnga pawimawhte inpawhtlang takin a sawipui a ni.

Hemi puala program tawi buatsaihah Governor Gen. (Dr) Vijay Kumar Singh chuan naupang tinte'n mahni pual danglamna an neih vek thu leh midang fate nena khaikhin vek a rem loh thu sawiin, zirlaite hrechiangtu nu leh pa leh zirtirtute chu exam hmachhawn kawnga zirlaite awmze nei zawka kaihruai turin a chah a. Exam pressure avanga harsatna thlengte'n tawrhna nasa zawk a thlen loh nan tanrual a tul tih sawiin, tha taka exam hmachhawn tur chuan rilru leh taksa hrisel mai bakah ei leh in chena uluk a ngai a ni, a ti a. Zirlaite chu hun vawng dik tur leh subject tinte tana ruahmanna tha siam tura chahin, nu leh pate pawh enpuia vilpui thin turin a chah a. Nu leh pa leh zirtirtute chu tawngkam dawnsawn leh hriat nuam zawk hmang hram hram thin turin a chah bawk.

Governor chuan exam-a mark hmuh zat chu thil pawimawh ber leh thutawp siamtu a nih vek bik loh thu pawh sawiin, inrintawkna, thiamna tak tak leh nungchang tha neih chu nakin zel atana thil pawimawh tak a ni, a ti a. Zirlaite hmakhua ngaia Prime Minister hmalakna 'Pariksha Pe Charcha' chu chhuanawm a tih thu sawiin, zirlaite chu he programme kaltlanga an thil hmuh leh hriatte chu ngaipawimawha chhawr tangkai tum theuh turin a fuih a ni.

He hunah hian school Education Department-a Special Secretary David Lalthantluanga chuan keynote address neiin SCERT Director Caroline Zoramthangi, Nodal Officer, Pariksha Pe Charcha (PPC) hnen atangin PPC chungchang ngaihthlak a nih bakah kumin January ni 24-28 inkara New Delhi-a PPC chungchang inzirtirna buatsaiha Mizoram aiawha tel Lalhriathlui, Class 12, St. Paul's HSS hnen atangin a tawnhriat te ngaihthlak a ni a. Hemi hnu hian Prime Minister leh Zirlaite inkawmhona thlirho niin C.Lalthanzira, State Project Director, Samagra Shiksha, Mizoram in lawmthu sawiin hun a hmang bawk a ni.