MCC bawhchhiatna ah complaint 4 thehlut tawh

Zonuna Kawlni (LENKAWL) • February 7, 2025 • Comments • Mizoram

Mizoram-a Village Council leh Local Council inthlan lo awm turah Model Code of Conduct bawhchhiatna kaihhnawihah tun thlengin complaint pali thehluh a ni tawh a, pathum chinfel tawh niin, pakhat chhui mek a ni.

MCC bawhchhiatna kaihhnawiha complaint thehluh zinga 2 hi State Election Commission a thehluh niin, Minister pahnih te laka thehluh a ni a, hei hi SEC chuan chingfelin, Minister Lalngnhinglova Hmar chuan MCC bawhchhiatna a neih loh thu leh Minister Vanlalhlana chuan a hriat loh vanga MCC a bawhchhiatna ah ngaihdam a dilna chu ngaihdamin, a Minister pisa atanga campaign na video chu dah bo tura tih a ni.

Hei bakah hian Lunglei District Tablabagh MNF Unit te chu MCC puan a nih hnuah MLA-LADS Fund hmanga Tablagagh-ah Lei siam that hna kalpuia puhna chu Vawiin hian enfiah a ni dawn a. Mamit District Kawrthah-ah pawh tunkar Thawhtanni zan khan kawng sira MNF Candidate te banner tar, hal a nih chungchanga complaint thehluh chu Police ten an chhuizui hnuah party politics-a inbeihna vang ni lovin zurui hawklak te thil tih a ni tih an finfiah a ni.