Kum 2024 khan Mizoram-ah ruihhlo vanga thi 67 an awm

Mizoram sawrkar-a Excise & Narcotics Department (END) chhinchhiah danin, nikum 2024 chhung khan Mizoram-ah ruihhlo vangin mi 67 an thi a, kumin 2025-ah ruihhlo vanga thi an la awm lo thung.

END chhinchhiah danin, kum 2024 chhunga ruihhlo vanga Mizoram-a thi mi 67-te hi mipa 58 leh hmeichhia pakua an ni a, kum 21 leh 57 inkar an ni a. Mi 67 zinga 39 chu Heroin ti thin an ni a, midang 28 chu ruihhlo dang ti an ni thung.

Kum 1984 atanga mikum 2024 thlenga Mizoram-a ruihhlo vanga thi END-in an chhin-chhiah chu mi 1,879 an ni a, heng zinga 1,653 (87.97%) chu mipa niin midang 226 (12.03%) chu hmeichhia an ni thung a. Kum 2023 chhung khan ruihhlo vangin mi 76 (mipa 64 leh hmeichhia 12) an thi a, kum 2004 hnua ruihhlo vanga thi tam ber kum a ni.

Mizoram-a ruihhlo vanga thi tam lai chu kum 1998-2004 inkar a ni a, hemi kum 7 chhung hian kumtin mi 80 aia tlem lo an thi a, kum 7 chhunga ruihhlo vanga thi belhkhawm chu mi 785 niin, chawhrualin kum tin mi 122 zel thi an awm ang a tling. Hetih hun laia an thihpui tam ber ruihhlo chu proxyvon/pasvon spas a ni. Ruihhlo vanga thi tam ber kum 2004 khan mi 143 an thi a, mipa 122 leh hmeichhia 21 an ni.

Hetihlai hian Excise & Narcotics Department (END) chuan kum 2024 chhung khan rakzu litre 67,911.515 leh sapzu um chi hrang hrang 34,704 an man a; Heroin kg. 46.566 an man bawk. END tarlan danin, Excise Enforcement-te chuan kum 2024 chhung khan rakzu lt. 67,911.515 an man bakah, zu bilh lai tin 1,26,337, Zu siamna bungbêl 2,933 leh dawidim (yeast) kg. 181.577 an man a; Myanmar zu (BEDC) pawh litre 4,119.840 zet an man a ni.