Assam Rifles chawimawi

Mizoram Governor Gen (Dr) Vijay Kumar Singh chuan 23 Sector Assam Rifles hnuaia awm, 2 Assam Rifles Battalion leh 42 Assam Rifles Battalion-te hnenah hnathawh that chawimawina, Governor's Unit Citation chu nimin khan a hlan a, Raj Bhavan Circular Lawn-a hemi puala hun hman ah Larsap chuan 2 Assam Rifles leh 42 Assam Rifles te'n India ram himna tura theihtawp an chhuah bakah, vantlang rawngbawl kawnga an thawh hlawk em avanga Unit Citation an dawng chu a lawmpui thu a sawi a. North East vawng-himtu leh tlang mite thian nihna an chawinung chu lawmawm a tih thu sawiin, Mizoram mipuite hmakhua ngaia hma la zel tur leh ruihhlo do leh ngawl veite chhawmdawl kawnga theihtawp chhuah turin a chah a ni. Larsap chuan Myanmar ram buai avanga harsatna hrang hrang kara Battalion pahnihte Dan leh thupek kenkawh kawnga hmalakna te fakawm a tih thu sawiin, Sahimna zawnga raltlante puihbawm leh chhawmdawl kawnga hmalaknate pawh chhuanawm a tih thu a sawi a, an hnathawh that chhuanawm tak chu an chhawm-nun zel a beisei thu a sawi bawk.