Village Council Inthlanpui neih tur atan Electoral Roll hman tur tlangzarh a ni

State Election Commission, Mizoram ruahman angin Village Council Inthlanpui neih tura Serchhip District chhunga Village Council hrang hranga Electoral Roll ennawn hna chu zawhfel niin nimin khan Serchhip District Election Officer (DEO) leh District Bawrhsap Paul L. Khuma chuan a tlangzarh.

Serchhip DC Meeting Hall-a Village Council Electoral Roll tlangzarh takah hian Bawrhsap Paul L. Khuma chuan Village Council Inthlanpui-a hman tur Electoral Roll ennawn hna tluang taka zawhfel a ni leh ta chu lawmawm a tih thu sawiin, sawrkar-a thawktute leh tlawmngai pawl hrang hrang, Village Level Officer (VLO) te leh Political Party bakah Village Level Standing Committee a thawktute inpekna chu lawmawm a tih thu a sawi a. Inthlanpui hmachhawn leh mai tur kan nih avangin inthlanna felfai leh thianghlim kan neih theihna tura tanrualpui-ah a sawm nghal bawk a. Hemi hnu hian Village Council 56 Inthlanpui a hman tur Electoral Roll chu a tlangzarh nghal a ni.

He hunah hian Serchhip Election Officer F. Lalnisai chuan Serchhip District-a Electoral Roll dinhmun tlangpui tarlangin, Serchhip District-ah hian Village Council 54 a awm mek thu leh VC thar pahnih siam a nih dawn avangin tun tumah hian VC 56 te tan Electoral Roll hi tlangzarh a nih thu a sawi a. North Vanlaiphai-a VC pakhat chauh awm thin chu thenin VC pahnih ah siam a ni dawn a, Thenzawl East Village Council pawh thenin Thenzawl South VC siam thar a ni dawn bawk a, Thenzawl-ah hian VC 5 a awm dawn ta a. Tun tuma Electoral Roll ennawn ah hian kum 2022-a Electoral Roll chu Draft Roll-ah hman a nih avang leh VC ramri siamthat engemaw zat a awm avangin Draft Roll aia punna sang tak tak leh kiamna nasa tak tak a awm thu a sawi bawk a ni.

Sawrkar in a kalpui mekah danah VC Seat neih theih zat chu In awm zat atanga chhut a ni a, In 200 hnuailam tan VC seat 3 awmin In 200 atanga 500 tan Seat 5; In 501 atanga 1000 thleng tan Seat 7 leh In 1000 chuanglam tan Seat 9 a awm thei dawn a ni.