Toyota Technical Education Program (T-TEP) hawng

Toyota Technical Education Program (T-TEP) chu nimin khan Labour, Employment, Skill Development & Entrepreneurship (LESDE) changtu Minister Lalnghinglova Hmar chuan Industrial Training Institute (ITI), Aizawl-ah a hawng.

Toyota Kirloskar Motor Private Limited (TKMt) en Govt. ITI-a zirlaite tana General Technician (Mechanic) Course zirtirna an pekna tur Toyota Technical Education Program (T-TEP) hawnna hunah hian LESDE Minister chuan thalaite tana tangkai em em tur thiamthil zirchhuahna bung thar a inhawng leh ta chu lawmawm a tih thu a sawi a. Mizoram sawrkar chuan thalaite'n chhawr tlak thiamna an neih theih nan kawng hrang hranga hma a lak thu leh a bik takin Skill Development and Entrepreneurship atana theihtawp a chhuah thu a sawi a. TKM nena an thawhhona zarah hemi kawnga tangkai tak tur ‘Toyota-Technical Education Program’ hmalakna chuan zirlaite tan industry lian tak takah te thawh theihna kawng a hawn theih a beisei thu leh chutiang tur chuan zirlaite pawh tih tak takna nen theihtawp chhuah a zir turin a chah bawk a ni.

Toyota Technical Education Program (T-TEP) hi kum 2006 khan bultan niin India ram State hrang hrangah ITI/Polytechnic/Diploma Institution dangte thawhpuiin zirlai thahnem tak an lo train chhuak tawh a. Mizoram hi he programme an kalpuina State 27-na a ni. Training na hmunhma Institute in a lo neih sa te chu an Company Standard mil turin a tul dan anga thuam tha in, Course atana material/equipment ngai zawng zawng chu Toyota Kirloskar Motors in an tum a. Zirtirtu tur Company in a train chhuah hmasak bakah Guest Instructor an kal thin bawk a. Govt. ITI a thawktu Vanlalthafamkima leh Lalhriatrenga te chu he Course zirtirna pe tur hian training an lo paltlang tawh a. Course hi kum khat niin Course tawpah Exam an pass chuan Toyota Certificate pek an ni dawn a. Tun tumah hian mi 24 an training phawt dawn a ni.