Social Media-a Journalistic ethics engmah awm lova duh duh an sawi mai thin kan vei a ngai

Information & Public Relation Minister Dr. Vanlalthlana chuan Social Media-a Journalistic ethics engmah awm lova duh duh an sawi mai thin chu kan vei a ngai tih a sawi.

I&PR Department-a thawk zawng zawngte leh MJA member-te tana Kumthar 2025 atana Inhlan tharna hun nimin-a I&PR Auditorium, Aizawl-a neih a hmanpuina ah I&PR Minister chuan tunlai khawvel ah technology a thang chak em em tih sawiin, “A bik takin Social Media-ah mi tupawhin an duhdan leh ngaihdan te an puangchhuak thinin, thenkhat phei chuan content an duh luat tukah thudik a nih leh nih loh pawh thlu lovin, thlirtu leh ngaithlatu an duh tam vangin a him leh him lo pawh thlifim lovin mipui rilru an hruai kawi nasa hle thin nniin a lang a, Journalistic Ethics engmah awm lovin an duh duh an sawi mai thin a, hei hi kan vei a ngai a ni,” a ti a, “Journalist te chuan mipui hnenah thudik leh rintlak, phuahchawp ni lo an hrilhhriat thin ang hi nasa lehzuala kan tih a ngai a, I&PR Department nen tangkawpa theihtawp kan chhuah a ngai a ni,” a ti bawk.

I&PR Minister chuan I&PR Officers, Staff leh MJA member zawng zawngte kumthar chibai bukin, Pathian in kumthar 2025 min hruai thlen avangin lawmawm a tih thu a sawi a, Kumthar ah rilru thar nen hmasawn tum tlang vek tura chahin, “Khawvel a danglama, kan kum a lo danglam zel rual hian a tha lam zawngin danglam vek ang u,” a ti a. Ram hmasawnna tur leh khawtlang hmasawnna tura sawrkar in ruahmanna a siam tipuitling turin theihtawp chhuaha tanlak puiah I&PR Department leh MJA member zawng zawngte a sawm a ni.

He hunah hian I&PR Secretary Betsy Zothanpari Sailo pawhin mihring theihna vang ni lovin Pathian kaihruaina kan dawn vanga tun hun thleng thei kan ni tih sawiin, I&PR Department leh MJA member ten thawhhona tha tak an neih chu chhunzawm zel pawimawh a tih thu a sawi a, mahni tanghma um lova Mizoram tana tha tur ber ngaihtuah chung zela thawk turin kalkhawmte a sawm a. Sawrkarin a chhawr sawrkar hnathawk zingah hna thawk tha duh lote chu an hna atanga chawlh tir turin thutlukna siam a ni tawh a, Review Committee pawh din a nih tawh avangin inthlahdah leh thatchhiat vanga mahni hna thawk tha duh lote chu dim an ni dawn lo tih a sawi bawk.

He hunah hian MJA General Hqrs. President C. Lalrambuatsaiha pawhin sawrkar in MJA te Press Tour buatsaih sak an nih thin bakah tunhnaia Mizoram Journalists Pension Scheme a taka kalpui anih taka vanga lawmthu sawiin, sawrkarin a theih ang anga journalist te a ngaih pawimawh thin avangin lawmthu a sawi a. MJA member te leh I&PR Department a thawkte chu taksa hriselna vawng uluk a hrisel tha taka hna thawk turin duhsakna a hlan bawk.