Serchhip District tana Electoral Roll siam thar tlangzarh niin naktuk-ah VC Roll tlangzarh dawn

Election Commission of India ruahman anga kumin January ni 1-a kum 18 tling chin te laa Serchhip District-a Electoral Roll siamthat hna thawh chu zawhfel niin nimin khan Final Electoral Roll tarchhuah a ni a. Village Council leh Local Council Inthlanna a hman tur Electoral Roll chu naktuk-ah tarchhuah a ni thung ang.
Serchhip District chhung Assembly Constituency pathum te tana Electoral Roll siam thar hi Serchhip DC Meeting Hall-ah Serchhip District Election Officer leh District Bawrhsap Paul L. Khuma chuan tlangzarhin tun tuma Electoral Roll ennawn hna hi uluk taka kalpui a nih thu sawiin, hemi atana thawktu hrang hrangte hnathawh chu fakawm a tih thu a sawi a. Gender Ratio-ah mipa leh hmeichhia an inthlauhna sang zel chu ngaihtuah zui ngai tak nia a hriat thu sawiin, hming thun thar dilna lut zinga hnawl awm chhan te pawh a tarlang bawk a ni.

He hunah hian Election Officer F. Lalnisai chuan Electoral Roll tlangzarh tak dinhmun tlangpui sawiin, Serchhip District-ah hian Assembly Constituency pathum (3) awmin Polling Station 88 a awm a, Vote nei thei General Voters-ah Mipa 26,583 leh Hmeichhia 28,344, an vaiin 54,927 leh Service Voters Mipa 360 leh Hmeichhia 5, an vaiin 365 an awm bawk a. Heti hian tun dinhmun ah Serchhip District pumah Vote nei thei mipa 26,943 leh hmeichhia 28,349, an vaiin 55,292 an awm a. Tun tuma Electoral Roll ennawn hna thawh a nih dawna Draft Electoral Roll tarchhuah aiin Vote nei thei hi 634 in an pung a ni.

26-Serchhip (ST) AC-ah Polling Station 29 awmin Vote nei thei mipa 9845 leh hmeichhia 11,156, an vaiin 21,001 an awm a, Service Voters mipa 176 leh hmeichhia 2 awm bawkin Polling Station mal-a Vote nei thei tamna ber chu 22-Serchhip-XII (LFCS) niin Vote nei thei 982 an awm a, Serchhip Bial-ah hian Polling Station pakhat-a Vote nei thei mi zakua aia tamna pali (4) a awm a, Vote nei thei tlemna ber Polling Station chu 29-Neihloh niin Vote nei thei 241 an awm a ni.

27-Tuikum (ST) AC-ah Polling Station 32 awmin Vote nei thei mipa 8494 leh hmeichhia 8684, an vaiin 17,178 an awm a, Service Voters mipa 106 leh hmeichhia pahnih awmin Vote nei tamna ber Polling Station chu 10-Chhuanthar Tlangnuam-II niin Vote nei thei 951 an awm a, Vote nei tlemna ber Polling Station chu 31-Vanchengte niin Vote nei thei 98 an awm a ni.

28-Hrangturzo (ST) AC-ah Polling Station 27 awmin Vote nei thei mipa 8244 leh hmeichhia 8504, an vaiin 16,748 an awm a, Service Voters mipa 78 leh hmeichhia pakhat an awm bawk a ni. Polling Station mal-a Vote nei tamna ber chu 11-East Lungdar-II niin Vote nei thei 922 an awm a, Vote nei thei tlemna ber chu 13-Chekawn niin Vote nei thei 218 an awm bawk a ni.