Road Protection Squad ten Serchhip-ah hma la leh

Serchhip District Road Protection Squad Team B te chuan nimin khan Serchhip Vengchung, Field Veng leh Dinthar VC area-a kawngpui dinhmun an endik.
Serchhip Road Protection Squad hian Serchhip khawpui chhunga kawngte hi a him tawk em tih leh vantlang tana hnawk thama kawngpui nek an awm em tih te an endik thin a. Kawng kam a dawr leh Workshop nei ten kawng an nek em tih te, garage nei loa kawng sira lirthei riah thin an awm em tih te an endik thin a. Serchhip Road Protection Squad hi Team 4- A, B, C leh D-ah inthenin Official te bakah tlawmngai pawl hruaitute leh Joint VC hruaitute an tel a. Serchhip khawpui chhung VC Area hrang hrangah insemdarhin a tahtawl in kawngpui te hi an endik thin a ni.

Nimin-a Serchhip Vengchung, Field Veng leh Dinthar Veng VC Area te endiktu Serchhip District Road Protection Squad Team B te hi an Leader leh SDC Dr. C. Vanlalchhanhimi chuan hovin kawngpui dung te chipchiar takin an fang a, lirthei leh mipui veivahna atana hnawk thei thil dahtute chu insenghawi turin an hriattir a ni. Road Protection Squad hian an hmalakna hi khauh taka kalpui an tum a, an endikna chungchangah a tul anga sawihona neih chhunzawm a ni anga, thla khat hnuah endik leh tur niin, bungraw dah sawn tura an tih ten thu an zawm em tih an en leh anga, dan zawm lote chungah a tul anga hmalak chhunzawm tur a ni ang.

Comments