Nikum-ah thi aiin piang 9600 in an tam zawk

Directorate of Economics and Statistics in a chhinchhiah danin nikum 2024 chhung khan Mizoram pumpuiah naupiang 16,136 awmin mitthi 6536 an awm a, nikum chhunga mitthi aia naupiang an tamna hi 9600 a ni.

Nikum 2024 January 1 atanga December 31 thlenga District hrang hranga naupiang zat te chu Aizawl District-ah 6751, Lawngtlai District-ah 2416, Champhai District-ah 1431, Lunglei District-ah 1406, Kolasib District-ah 1159, Mamit District-ah 1048, Siaha District-ah 918, Serchhip District-ah 429, Saitual District-ah 319, Khawzawl District-ah 214 leh Hnahthial District-ah 74 te an ni a, nikum chhunga Mizoram puma naupiang chhinchhiah zawng zawng hi 16,136 a ni.

Directorate of Economics and Statistics in a chhinchhiah danin nikum 2024 January ni 1 atanga December ni 31 thleng khan Mizoram-ah mitthi 6536 an awm bawk a, heng mitthi chhinchhiah zingah hian Cancer vanga thi mi 641 awmin Cancer hi natna zinga thihpui tam ber a ni a, a dawtah thawk lama harsatna, Respiratory Diseases vanga thi tamin mitthi 532 an awm a, Lung Natna (Heart Diseases) vanga thi mi 482 awmin thihpui tam ber pathumna a ni a, chetsualna avanga thi 216 awmin mahni intihlum mi 58 an awm a, Thisen sang (Hypertension) vanga thi 55 awmin TB vanga thi 39 leh Malaria vanga thi 26 an awm bawk a, Thin lam natna vanga thi mi 27, COVID-19 vanga thi mi 2, HIV/AIDS vanga thi pakhat leh chhan dang dang vanga thi 4457 an awm bawk a ni.