Leisang Veng-a Sports Complex kawng siam mek

Serchhip Leisang Veng atanga Serchhip Hmar Veng Sports Complex panna kawng blacktop hna chu thawh mek niin karleh lamah chuan he hna hi zawhfel hman beisei a ni.
PWD Serchhip Division-a thawktute hnen atanga LENKAWL in thu a dawn danin Serchhip Leisang Veng atang Serchhip Hmar Veng panna kawng hi nikum Krismas hma deuh atang khan kawng chhuat te siamremin hna an lo tan tawh a, Krismas hma khan Boulder te phah niin hemi hnu hian WBM chu phah leh a ni a, niminpiah atang khan Rora leh Bitumen chawhpawlh chu phah lehin hei hi nimin khan zofel hman tura ruahman a ni a, Vawiin atang hian a chung ber turin Balu leh Bitumen chawhpawlh chu phah leh tan tur a ni anga, hei hi ni thum chhung vela zawh hman beisei a ni.

Serchhip Leisang Veng atanga Serchhip Sports Complex panna kawng awmsa pawh tur kawng siam hna thawh mek hi meter 500 vela thui niin tunah hian Leisang Veng Lane hnuai panna kawng chin siam mek a ni a, NH. 54 atanga he kawng siam mek pawh lehna tur hi thui vak lo siam tur la awmin hei hi reilote chhunga zawh mai theih tura ngaih a ni a, harsatna dang a awm loh chuan karleh chhung khian he hna hi zawhfel hman an inbeisei thawktute chuan an sawi a ni.