Feb. 20-ah Sawhthing lei kalpui tan dawn thu sawi

Agriculture Department changtu Minister PC. Vanlalruata chuan February 20, 2025 atangin Mizoram sawrkar in Sawhthing lei a kalpui tan dawn tawh avangin Sawhthing chingtute lo inbuatsaih turin a chah.

ZPM in nimin-a Party Chhung Inkhawm Aizawl-a an neih ah Agriculture Department changtu Minister PC. Vanlalruata chuan Sawrkar kal tawhte khan an Flagship Programme chu term tawp dawn lamah an buaipui chauh thin nia sawiin, “Inthlan dawna Politics khelh nant e pawh an hmang fo a ni,” a ti a. Kalphung thar mipui Sawrkar erawh chuan an policy-te chu term tawp dawna politics khelh nan hman an tum ve lo tih sawiin, “Bana kaih – Hand Holding Scheme hmangin kuthnathawktute khaichhuah kan tum a, thlai pali - Sawhthing, Aieng, Hmarcha leh Hmunphiah lei turin kan inbuatsaih chho mek a ni. Hmunphiah bikah phei chuan Empanelled Buyer pasarih kan thlang fel tawh a, VC inthlan hma ngeia Sawhthing lei tumin ruahmanna kan siam a, amaherawh chu Sawrkarin VC inthlan hun a rawn puan hma tak avangin VC inthlan hma chuan kan lei hman dawn ta lo a, kan hun ruat February 20, 2025-ah erawh Sawhthing kan lei tan ngei dawn a, Sawhthing chingtute pawh lo inbuatsaih turin kan chah a ni,” a ti.

Sawrkar kan neih tawh te ah kuthnathawktute an beidawng thin nia sawiin PC. Vanlalruata chuan, “Kalphung thar mipui Sawrkar hnuaiah erawh thlai thar lei hi a takin kan kalpui tawh dawn a, nikum lamah cheng vbc. 110 kan nei tawh a, kumin Budget-ah vbc. 200 kan dah leh a, chuvangin Sawrkar thar chuan inthlan laia kan lo au hla ang ngeiin kan policy kan tihhlawh tling dawn a, Zoram mipuite pawhin hei hi min hriatpui se kan duh a ni,” a ti.

Sawrkar kal tawh ten Rulling LC/VC neih a tul zia an lo aupui tawh thin thu pawh sawiin, “Chuvangin Mizoram mipuite pawh Sawrkar lai ngei LC/VC Candidate lo Vote tling turin ka sawm che u a, Sawrkar hmalakna tluang taka a kal theih nan leh hmasawnna tluantling kan ramah a thlen theih nan Sawrkar tha tichak turin Ruling LC/VC a tam thei ang ber kan  neih theih nan Zoram mipuiten min thawhpui leh turin kan ngen che u a ni,” a ti.