MPCC President hovin LC Member te an inkawm

Mizoram Pradesh Congress Committee (MPCC) President Lal Thanzara chuan Village Council tha, Local Council tha kan neih loh chuan ram tha a neih theih tak tak loh niin a sawi.

Nimin khan Congress Party Local Council Member te chuan Congress Bhavan-a Lal Than-hawla Auditorium-ah MPCC President Lal Thanzara hovin inkawmhona an nei a, MPCC President chuan Pathian in kohhran leh politics hi a rawngbawl nan, ram siamthat nana min pek a ni tih sawiin, “Village Council tha, Local Council tha kan neih loh chuan ram tha a neih theih tak tak loh a ni. Kan pawimawhna hi a sang em em a ni,” tiin kan ram siamtha tur chuan politics leh Kohhran kan tanrual a ngaih thu leh Village Level-ah Local Council Level-ah chhungkaw tha kan din phawt a ngai tih a sawi a. “Kan ram hi chhan tlak in a la awm a, mahse ZPM sawrkar hian an term an hman zawh chuan kan chhe viau ang,” a ti.

ZPM sawrkar in sum leh pai an puk pawp pawp dan chu mipuite hriat vek a ni tih MPCC President chuan sawiin, “Engvangin nge an pûk an pûk a ngaih? Central-a a chahbi kawltute khu he sawrkar chuangah hian an lawm viau lo a nih ka ring tlat. Chuti ni lo se chuan pawisa an pûk an pûk ngai lo hian an rawn enkawl theih ka ring tlat a ni. ZPM tana lâi em em chu BJP zawmpui pangngai awm anga an inlan rual rualin Mizo Kohhran miten an thinhrik ang tih an hlau bawk si a ni,” a ti a. “He sawrkar hi a thutiamah a ding dawn em, ding thei dinhmunah pawh hian a ding dawn em tih hi ngaihtuah tham tak a ni tih hi kan hriatt hiar leh a, a la hre lo te pawh kan hrilh var a ngai a ni. Sawhthing lei te an tum tan a, thingtlang kutthnathawktute beiseina tihlawhtlingin leisak thei hram se tih hi Congress party tena kan duhdan a ni,” a ti bawk.