Chief Minister in Infiammite Bana Kaih Programme, Hand Holding Empowering Mizoram Sports a hawng
Infiammite Bana Kaih Programme (Hand Holding Empowering Mizoram Sports) chu nimin khan Chief Minister Lalduhoma chuan hawngin he hmalakna bultanna atan hian sawrkar chuan cheng vbc. 2.5 a ruahman a, infiamna chi thenkhat ah chuan hmalakna kalpui chhoh mek a ni.
Bana Kaih - Empowering Mizoram Sports hawnna hun Economic & Statistic Directorate Conference Hall-a neih ah hian Chief Minister Lalduhoma chuan nikum June thla ah Mizoram-a a vawikhatna atan Mizoram Sports Conclave an neih thu leh India rama infiamna lama hriatna thuk tak tak neite nen an sawrkarin Sports hmasawnna atana an hmalak dan tur inrawnkhawmna an nei tih sawiin, “Khami tum khan Mizoram sawrkarin Vision 2036 kan kalpui tur thu ka puang a nih kha,” a ti a. “India ram hian kum 2036 Olympic lo awm tur khi thlen a tum a, dilna pawh a thehlut tawh a, kan Prime Minister Pu Narendra Modi leh ram hruaitu lian te pawh an phur hle a. He Olympic lo awm tur hi thlirin Mizo thalaiten India ram aiawha Olympic 2036 a an inlan ve ngei theih nan Vawiin atangin hma kan lo la ve dawn a ni. Kan tihtur hmasa chu kan naupang talent nei thate zawn chhuah a nih angin Vawiin ah chu mi hmalakna tur Empowering Mizoram Sports kan hawng ta a ni,” a ti.
Chief Minister chuan thalai thlanchhuahte hnena training tha pek mai bakah Sports Infrastructure tha tak tak neih belh pawh an tum dawn tih sawiin, “Olympic Sports discipline, Mizote khelh theih chi, infrastructure kan la neih si loh lamah kan mit kan len ang. Sports Minister tha tak kan nei a, a thlamuanthlak a, kum reilote ah hmasawnna hmel duhawm tak tak kan hmuh ngei ka ring,” a ti bawk.
Sports & Youth Services Director H. Lalhmingthanga kaihhruai he hunah hian Sports Minister Lalnghinglova Hmar pawhin EMS hmalakna hian thingtlang kilkhawr ber ber a thleng phak dawn tih sawiin, “A thlawna inpek hi kan kalphung a nih loh avangin sawmna kan dawnna hmun kan pan thin ang. A bik takin Olympic Sports discipline, Mizoten theihna an neihna ni si lamah zel kan insawrbing ang. Sawrkarin amahin engmah a kalpui thei lova, khawtina khawtlang hruaitute leh Mizoram State Sports Council te nena tang tlangin kan kal dawn a ni,” a ti a, thawhpui atana Corporate lian tak tak nena an inbiak mek thu pawh a tarlang bawk.
Infiammite Bana Kaih Programme hawnna hunah hian Mizoram State Sports Council Secretary C. Lalrawnkima chuan Empowering Mizo-ram Sports hmachhawp leh hmalak tawh chin te sawifiahin, Bana Kaih - Empowering Mizoram Sports bultan nan sawrkar chuan cheng vbc. 2.5 a dah a, tunah hian naupang theihna nei dap chhuahna hmahruai atan Tuichangral leh Tuipuiral Games huaihawt tan chhoh mek a ni tih he hunah hian tarlan a ni bawk.
Comments
Post a Comment