Bank ten huang an zauh a tul thu CM in a sawi

Chief Minister Lalduhoma’n Mizoram-ah Bank ten huang an zauh a, hmun kilkhawr zawka mite ban phak-a an awm a tul hle tih a sawi.

Nizan hmasa-a Special State Level Bankers' Committee Mizoram for the quarter ended September, 2024 Aijal Club-a neih a hmanpuina ah he thu hi sawiin Chief Minister chuan Mizoram-ah Bank engemawzat awm tawh mahse a tam zawk chu Aizawl leh District Capital-a inbun an la ni tih a sawi a. Banking huamzau tha leh zau Mizoram in a mamawhna a sang hle tih sawiin, CD Ratio in hma a sawn tih a hmuh thu a sawi a. Hetih rual hian Bank thenkhat CD Ratio hniam leh lutuk, zaa 40 aia hniam engemawzat an la awm thu leh Bank thenkhat phei chuan zaa 20 pawh an phak loh thu sawiin, Mizoram atangin deposit an dawng khawm a, chumi atanga zaa 20 vel Mizoram-ah an puk chhuahtir a, a dang zaa 80 vel State dangah an puk chhuahtir tih sawiin, Mizo mipuite zahlohna tlinga a hriat thu leh sumdawn nan chauhva rawn hmang Bank an mamawh loh thu leh hmasawnna hna thawhpuitu tur a duh tih a sawi a ni.

Chief Minister chuan sawrkarin mi rethei zawk khaichhuah tuma Agriculture & Allied Sector leh MSME lamah thapui thawhin hma an la chho tih sawiin, Bank chu an thawhpui pawimawh ber zinga mi an nih thu leh inthlahdah lo tura a duh thu a sawi bawk.