Synod Inkhawmpui neih a ni

Mizoram Synod Inkhawmpui vawi 101-na chu nimin Pathianni hmang khan Aizawl-a Mission Vengthlang Presbyterian Kohhran Biak In ah neih a ni.

Mizoram Synod Inkhawmpui vawi 101-na hi Thawhlehni atang khan neih niin Nilaini atanga Inrinni thleng khan Rorel a ni a, ruihhlo ti ve lo te ven kawngah hmalakna rawtna chu pawm niin; Synod Executive Committee SEC bawhzui tura dah a ni a, Kristianna humhim kawnga nasa zawka hmalakna te rorel inkhawm ah sawiho a ni bawk a; uchuak taka taksa pholan a reh theih nana hmalak rawtna chu mahni Kohhran theuhah hmalak nise tih a ni a. Sunday School kaikim chawi-mawina siam belh rawtna pawh pawmin Council of Churches in Mizoram puala Special Sunday siam rawtna chu an rawtna angin October thla Pathianni vawi 4-na chu rem tih a ni a. Presbyterian English School (PES) tha zawka enkawl dan tur rawtna chu tha tih a ni a. Central KTP Leader thar atan Rev. H. Lalawmpuia (Sakawrtuichhun) an thlan chu pawm a ni bawk.

Nimin Pathianni Inkhawm ah Pastor 17 te chu ngemngheh niin Probationary Pastor mi 21 te dahnghehna neih a ni bawk a, Chawhnu inkhawm ah Lalpa Zanriah Sakramen kilho in nizan khan Moderator kalchhuak tur Rev. R. Vanlalnghaka’n Pathian thuchah a sawi bawk a ni.

Mizoram Synod hnuaiah hian tun dinhmun ah Kohhran 1169 awmin, Pastor Bial 304 a awm mek a. Pastor/Minister nilai mi 603 awmin kumin ah mi 142 an pension a. Kohhran member  6,39,289 awmin, Dan zawhkim mi 4,67,627 an awm a, kum 2023 leh 2024 inkarah naupiang zat Mipa 4185 leh hmeichhia 3911 an awm bawk a. Kum 2022 leh 2023 chhunga naupiang zat phak lohna hi 303 a ni a. Kum 2022 leh 2023 inkar ah hian naupiang mi 8399 an awm laiin, nikum leh Kumin kal mekah mi 8096 naupiang thar an awm a ni. Kohhran member thi nikum leh kumin kal mekah mipa 2915 leh hmeichhia 1606 an awm a, kum 2022 leh 2023 inkar ah mitthi 4343 an awm bawk.