Petrol leh Diesel atangin Cess hmu tam tawh

Mizoram sawrkarin kumin September ni 1 atanga Petrol leh Diesel man atanga Chhiah a tihpun atangin, November thla thleng khan Road Maintenance Cess leh Social Infrastructure & Services Cess atangin Rs. 442,98,664/- hmuh a ni tawh. Taxation Finance Department chuan August ni 30-a hriattirna a tihchhuahah Petrol leh Diesel-ah litre khat zelah Social Infrastructure & Services leh kawngpui enkawlna atan Cess Rs. 2 ve ve lak a nih tur thu a chhuah atangin chhiah hi lak tan a ni a. October thla khan Rs. 16,48,352/- hmuh a ni a. November thla bikah Rs. 426,50,312/- hmuh niin November-a chhiah (Cess) lut a tam nachhan hi October thla khan khawl lamah fel lo a awm avangin Petrol Dealer-te’n pawisa an thun theih loh vang a ni. Sawrkar chuan Road Maintenance Cess chu kawng enkawlna atan liau liau a nih tur thu an lo sawi tawh a, Social Infrastructure & Services Cess chu zirna In tihchangtlunna atan te, hriselna kaihhnawiha hman atan te, Skill Development leh hmeichhia te chawikanna atana hman tur a nih thu an sawi a ni.