Serchhip Sub-Hqrs. YMA buatsaih ‘Inter-Branch YMA Volleyball Tournament-2024’ chu Inrinni khan khelh zawh niin he Tournament kharna Inkhawm hi Central YMA President Lalhmachhuana chuan khuallian niin a hmanpui a ni.
Serchhip P&E Veng Leisekawt Mual-a khelh Inter-Branch YMA Volleyball Tournament kharna hunah hian Central YMA President chuan Serchhip Sub-Hqrs. YMA in hetianga Tournament an huaihawt chu lawmawm a tih thu sawiin, kan ram ah thalai ten ruihtheih thil an buaipui nasa in ruihhlo laka thalaite an lo fihlima thalai fit tha kan neih theihna tura hetiang hun hi buatsaih a nih thu a sawi a. Tunhnaiah Mizo thalaite, a bik takin mipa kan thi nasa hle tih sawiin, chhan hrang hrang zingah ruihhlo leh a kaihhnawiha thi chu a tam ber pawl a nih thu a sawi a, hei vang hian Mizo mipa ten he Tournament kaltlang hian kan tih tur hriain, chhungkaw nghelnghet din tura inenfiahna atan he Tournament hi hmang se a duh thu leh hmeichhia te pawhin mipa te an thih nasat avangin an mawhphurhna te hlen tura tumruhna an neih theihna atan hmang se a duh thu a sawi bawk a. Mizo ten Programme chi hrang hrang hmangin eng eng emaw kan huaihawt thin thu pawh Central YMA President chuan sawiin, heng te hi hlawhtlinpui tur chuan tumruhna leh tih tak takna kan neih a tul thu a sawi a, “A ti tak tak leh taima taka ti hram hram thin te hi a tawpa hlawhtling an ni thin tih i hria ang u,” tiin kan thil tihna kawng hrang hrangah tih tak takna kan neih a tul thu a sawi a ni.
He Tournament kharna inkhawm hi Serchhip Sub-Hqrs. YMA Sports & Recreation Committee Chairman Kaptluanga Ralte chuan kaihruaiin Sub-Hqrs. YMA President Kawlthuama pawhin thu a sawi bakah Match Commissioner Lalbiakdika chuan Report a pe bawk a ni.
Tun tum Tournament-ah hian Branch 24 te inelna Mipa Team-ah Chhiahtlang Zotuithiang Branch YMA chuan Final-ah Serchhip Vengchung Branch YMA chu 3-2 (23-25, 25-19, 26-24, 18-25, 15-7) a hnehin an Champion a, lawmman ah Rs. 30,000/- dawngin pahnihna hian Rs. 15,000/ an dawng bawk a, Zorinpuia chu Best Spiker atan thlan niin Best Setter atan Lalhriatzuala thlan a ni bawk a, an pahnih hian Chhiahtlang Zotuithiang Branch ve ve an ni a. Mipa inelna ah hian match 39 khelh a ni.
Hmeichhe lamah Branch 14 inelin Final-ah Serchhip Vengchung Branch chuan Keitum Branch chu 3-1 (21-25, 25-15, 25-16, 25-19) a hnehin an Champion bawk a, Champion Team hian lawmman ah Rs. 20,000/- dawngin pahnihna hian Rs. 10,000/- an dawng bawk a, Best Setter atan Malsawmkimi leh Best Spiker atan K. Lalremruati te thlan niin an pahnih hian Serchhip Vengchung Branch YMA ve ve an ni bawk a. Hmeichhe inelna ah hian match 25 khelh a ni bawk.
Comments
Post a Comment