PMAY hmang tha mi 3 lawmman pek an ni

Sawrkar laipui ruahmanna a In sak tanpuina, PMAY–Housing For All hamthatna dawng zinga sawrkar laipuiin Mizoram atanga titha zual a thlanchhuah mi pathumte hnenah nimin khan lawmman hlan an ni.

UD&PA Directorate Meeting Room-a ‘PMAY-U Award’ hlan te hi Lalmuanpuii, Champhai; Vansangliana, Mamit leh Lalramngheta, Kolasib te an ni a, he hun hmanpuitu UD&PA Minister K. Sapdanga chuan lawmman dawngtute chu lawmman lak phu, mi entawntlak an nih thu sawiin, an kutchhuak a hmuh atangin rilru dik tak pu a kutchhuak chhuanawm tak an nei chu mi ropui tak tak thenkhat in an tluk loh a nih thu a sawi a. Tun tuma lawmman dawngtute chu dik taka an sum hmuhte an hman avangin chawimawi an phu thu a sawi bawk.

Housing for All (Urban) hi India ramah June, 2015 khan tlangzarh niin Mizoram pawhin kum 2015 atangin bul a tan ve nghal a. He Scheme hi kum 2022 thleng kalpui tura ruahman ni mah se December ni 31, 2024 thleng pawhsei leh a ni a. Mizoram-a Cencus Town 23 huamin In 37,244 sak tur a ruahman na siam a ni a. Chumi atan chuan Project Cost ah cheng vbc. 744.88 dah a ni a. Ministry atanga Central Assistance(CA) hmuh beisei zat chu cheng vbc. 558.66 a ni.