Bana kaih in mipui rilru puthmang siamthat tum

Chief Minister Lalduhoma chuan Kalphung thar mipui Sawrkarin Bana Kaih (Handholding) policy hmanga mipuite rilru puthmang siamthat an tum thu a sawi.

ZPM Zonu General Hqrs. in nimin-a Advance Krismas an hmanna a hmanpuina ah he thu hi sawiin Chief Minister chuan hun rei tak chhung ‘Sem policy’ hmangin kan ram hi kaihhruai a lo ni tawh thin tih a sawi a, chuchuan kawng tam takin mipuite rilru puthmang a dik lo zawngin a hruai nasa hle nia sawiin, “Sem policy khan mi tam tak kutdawh rilru a put tira, chu chuan kan ram mipuite hmasawnna tur a ti thuanawm nasa hle a ni. Kalphung thar mipui Sawrkar erawh chuan Sem Policy ni lovin Thawhrimna kan zuar a, Bana kaih, Hand holding Policy hmangin mipui rilru puthmang siam that kan tum mek a ni,” a ti. Bana kaih Policy hnuaiah Entrepreneurship Hanholding, Chief Minister Special Pakage leh Thlaithar lei kalpuiin hma an la mek tih a sawi a, “Heng te hi ruahmana felfai tak leh kalphung mumal tak hnuaiah lo chuan thil tih theih a ni lova, Thlai thar lei chung-changa ruahmanna kan siamte pawh mipuiten lo ngaihvena, thawhrim rah duhawm tak seng turin kuthnathawktute duhsakna kan hlan a ni,” a ti bawk.

ZPM Party chu party naupangte nimahse Opposition an nih lai atang tawhin beihrawn an hlawh hle nia sawiin Chief Minister chuan, “Sawrkarna kan chan hnuah pawh thudik tawk lo hmanga beih chhunzawm kan la ni reng a, mipui tana thudik hriat hleih theih loh khawpin beihna kan tawk fo a ni. Heng min beihnate lo sepui ruah-tawrh ngawt mai hi a fuh ber lova, mipui hnena thudik kan puanchhuah ve fo a tul a ni. Min beitute hian dawt pawh an hmang hreh lo a, chuvangin thudik puanchhuah kawngah hian tan kan lak a tul hle a ni,” a ti bawk.