NCORD hmalakna thlirho
He thutkhawm ah hian Bawrhsap chuan ruihhlo dona kawnga sawrkar, khawtlang leh mipui tanhona a pawimawh zia hre thar leh turin mipuite a chah a. Social Media lama awareness campaign neih mek te, Police leh Excise Department hmalakna te, Drug Inspector te leh YMA hmalakna te fakawm a tih thu sawiin, Ruihhlo do hneh tur hian kil hrang hrang atanga hmalakna kalpui leh tanho a pawimawh thu a sawi bawk.
He huna tarlan a nih danin Meeting hmasa in a lo rel tawh angin Sr. CMO Serchhip District hmalakna in Food & Drug Inspector te chuan August atanga November thla chhungin Serchhip District-a damdawi dawr 31 zingah 23 endikin Serchhip Dinthar Veng-a dawr 1 leh Chhiah-tlang-a dawr 2 atangin abusive drugs - Spascare, Alprazolam, Dolphen leh a dangte engemawzat an man a. Danin a phut angin CCTV chu Pharmacy 25-ah vuah a ni tawh a, hei hi za zelah 80.64 a ni a. National Tobacco Control Program hnuaiah awareness campaign pawh School 22 leh biak In pakhat ah neih a ni.
ND&PS Act hnuaiah Excise & Narcotics chuan July 27 hnu lamah thubuai 14 an ziaklut a, dan bawhchhia a puh mi 19 manin heng te hi mipa 13 leh hmeichhia 6 an ni a, Heroin gram 884.34 an man a ni. Serchhip Police te hian kumin chhungin ND&PS Act hnuaiah thubuai 12 ziaklutin mi 16 an man a; Heroin gram 258.47 leh ganja kg 3.12 an man a. MLP Act hnuaiah thubuai 15 an ziaklut tawh a, mi 21 an man a. Awareness Campaign tum 18 an nei tawh bawk.
Heng bakah hian Ruihhlo dapchhuahna kawnga thawhhona chungchang pawh sawiho niin BSF, Assam Rifles, Excise & Narcotics te leh Police Department tanghoin Joint Operation neih thin nise an ti bawk.
Comments
Post a Comment