Mipuite tih beidawn kan tum lo - Agri. Minister

Agriculture Minister leh Mizoram Agricultural Marketing Board Chairman PC. Vanlalruata chuan Campaign laia an lo aupui tawh angin thlaithar lei turin Lalduhoma kaihhruai ZPM Ministry chu a inbuatsaih mek tih sawiin, “Mipuite tih beidawn kan tum lo,” a ti.

ZPM Party chuan nimin khan Aizawl-a an party Office-ah Chhung Inkhawm neiin Agriculture Minister leh Mizoram Agricultural Marketing Board Chairman PC. Vanlalruata chuan ZPM Party chuan Campaign lai atangin Thlaithar lei chungchang an lo aupui tawh thin tih sawiin, “Kan lo aupui tawh ang ngeiin tunah hian thlai pali Sawhthing, Aieng, Hmarcha leh Hmunphiah te lei turin Marketing Board kan din ta a, he Marketing Board hian chak takin hma a la mek a, tunhnai khan International Conclave Cum Buyer Seller Meet kan buatsaih a, India ram mai bakah ram hrang hrang atangin thlaithar ngaihventu an lo pungkhawm a, Pathian zarah kan hmalakna a kal tluang hle a ni,” a ti a. “Hetiang a nih mek lai hian mi thenkhat chuan thlaithar hi lei thei lo ila, mualpho takin Sawrkar hi awm se an duh emaw tih mai turin min chang reng a, nimahsela, Pu Lalduhoma kaihruai ZPM Ministry hian thlaithar hi kan lei ngei dawn a, mipuite tihbeidawn kan tum lo a ni,” a ti.

Tunah hian District tinah Agriculture Marketing Committee an din tawh thu leh khaw hrang hrangah Society 800 dawn an din tawh thu pawh Agricultural Marketing Board Chairman PC. Vanlalruata chuan sawiin, “Sawhthing leh Aieng hi January - May thla thleng Sawrkarin a buaipui dawn a, hmunphiah leh Hmarcha bikah January - March thla chhung Sawrkarin a Market a buaipui bawk dawn a ni,” a ti a. “Khaw tina Society kan dinte hi Parmary Collection Centre-ah puan an ni dawn a, Sawrkar buaipui ngai kher lova anmahni a Auction an lo tih ve theih chuan Sawrkar inrawlh kher ngai lovin anmahnin Society in an hralh dawn a, Sawrkar rate anga leisaktu an hmuh loh erawh chuan Secondary Collection khaw 45 kan puan tawhah an rawn hralh mai dawn a ni,”a ti a. Primary Collection Centre atanga Secondary Collection Centre thleng thlaithar phurh man chu Society in an lo buaipui ve thung dawn tih a sawi bawk.

Minister chuan Sawrkar thar in thlaithar lei leh hralh chungchang mumal taka kalpui a tum thu sawiin, Thlar thar chhekkhawlna hmun, Wholesale Market pawh hmun hnih ah an din dawn thu a sawi a, Sihphir leh Melthum-ah din turin hma an lak phawt thu leh a intahtawl zelin an thlaithar dahthatna tur leh Wholesale-na tur hmun an buatsaih mek thu a sawi a, ‘Kuthnathawktute harsatna sutkian zel hi kan tum tlat a ni,” a ti.

Buhhum lei tum chungchang pawh Agriculture Minister chuan sawiin, “Kan ram a lo dinchhuaha, State dangte anga buh leh bal-a kan intodelh theih nan hma kan la mek a, kan hma lawkah hian Mamit leh Kolasib District-ah Buhhum lei tan kan tum bawk a ni,” a ti bawk.