CM in Mizoram Police Sports Meet a hawng

Chief Minister Lalduhoma chuan Police hna chu taksa leh rilru hrisel nei te thawh chi hna a nih avangin Police ni turin Physical Test leh Exam paltlang a ngai tih a sawi.

22nd Mizoram Police Sports Meet hawnna hun nimin-a 1st Bn. MAP Ground, Armed Veng-a neih ah Chief Minister Lalduhoma chuan he thu hi sawiin, Police-a luh hnuah pawh training hautak tawk tak neihpui leh an ni tih a sawi a. Service hnuah pawh ngaihpawimawh zui zel niin tun neih Sports Meet pawh hian chu chu a tum a nih thu a sawi a. “Infiamna lamah kan Police te hian Mizoram in tihmingtha thin a, tunhnai lawkah pawh C. Lalruatkima, 1st Bn. MAP chuan Asian Open Police Taekwondo Championship-ah Gold Medal a la a. Ka Social Media platforms ah te ka lawmpuina ka ziak nghe nghe,” a ti a. “Kan sawrkarin kan ngaihsak che u tih hi a takin kan lantir a, in transfer TA leh hamthatna dang, hun rei tak lo tang tawh te kan release nasa a, Rifle Allowance pawh kan tipung a ni. In indaihlohna pawh kan hriaa, hnaruak engemawzat hnawhkhat turin hma kan la mek bawk,” a ti.

Ram changkangah chuan mipuiten Police an zahin an ngaisang thin tih pawh Chief Minister chuan sawiin, naupangte pawhin Police nih te, Fire Fighter nih te an chak thin tih a sawi a. “An Police te entawntlaka an nun vang te, khawtlang tana hna tha an thawh tlat vang te a ni. Mizoram Police te pawh hi entawn tlak ni tlat ang u,” a ti a. Home Minister K. Sapdanga ruahmannaa kumin August thla atanga 45 minutes for all ranks of Mizoram Police programme an kalpui chu Unit zawng zawngten tha taka lo zawm turin a chah bawk a ni.

He Sports Meet-ah hian Police te chu pawl (contingent) 12-ah inthenin infiammi 1200 zetin Sports Discipline 18-ah inelna an nei dawn a, tun thla ni 13-ah a kharna hun hman leh tur a ni ang.