SW&TA-ah ruang phurhna Bill 180 lut tawhin mitthi chhungte tana buaipui ngai tawh lo tura ruahman a ni

Mizoram sawrkarin September 1, 2024 atanga ruang phurh man (bill) a pek sak theih hnuah Bank lama buaina awmte tih loh chu pawisa pekchhuah vek an ni tawh a, Ruang phurh man hi mitthi chhungte'n buaipui tawh lovin a phurtu Ambulance/Motor-te'n SWTA Directorate-ah an buaipui tawh dawn a ni.

Social Welfare & Tribal Affairs (SWTA) Minister Lalrinpuii chuan ZPM sawrkar chuan an Policy-ah ruang phurh man (bill) sawrkar mawha dah a telh thu sawiin, “Budget kan siam a, sawrkar atangin cheng vbc. 5 kan hmu. September 1, 2024 atang khan ruang phurh chu sawrkar kutah awmin, January 3, 2025 thleng hian ruang phurh man dilna 180 a lo lut tawh a, bill hi a vaiin Rs 16,36,744 a ni,” a ti a. Kum 2024 Krismas hma khan ruang phurh man diltute Bank Account-ah pawisa thun deuh vek a nih thu leh IFSC code dik lo leh Bank Account-a buaina awmte hnenah chauh pawisa an la thun loh thu a sawi a ni.

Ruang phurh man inpek dan chu a awlsam zawk theih dan tur an ngaihtuah zel thu sawiin Minister Lalrinpuii chuan, “State Transport Authority (STA) lamah Ambulance hman man (rate) min bituksak turin kan ti a, December 23, 2024 khan a rate tur min siamsak a, khawpui pawn leh Town area-ah kilometer khatah Rs. 40 (garage to garage) min siamsak a ni,” tiin he rate siam sak zulzui hian December 23, 2024-ah Ambulance neitu/khalhtu pawlte leh sawrkar hotute thukhawmin STWA Directorate-a an bill theih mai turin pawisa an dah thu a sawi a ni.

Ruang phurh man hi mitthi chhungte'n buaipui tawh lovin, a phurtu ambulance/motor-te'n SWTA Directorate-ah an buaipui tawh dawn tih Minister chuan sawiin, Motor dang pawhin ambulance rate hian an bill thei tho a, pawisa hi lakchhuah (draw) sa vek tawh a ni tih a sawi a. Ambulance/motor neitute Bank Account-ah dan anga an bill vek hnuah pawisa thun zung zung theih turin ruahmanna an siam thu leh Ambulance pawl President VL. Ngheta (7005281560) leh Secretary Nunhlima (9774464933)-te hnenah ruang phurh tur a awmin biak mai tur a ni tih a sawi bawk.