Mathematical Olympiad Exposure Camp nei tan

Tun thla ni 13 thleng awh tur, Mathematical Olympiad Exposure Camp chu nimin khan Pachhunga University-ah neih tan a ni a, School Education Minister Dr. Vanlalthlana chuan khuallian niin a hmanpui a ni.

He Camp hawngtu School Education Minister Dr. Vanlalthlana chuan Mathematics thiam a pawimawh zia sawiin, ngaihtuahna tihriamtu a nih thu a sawi a. Engineering, Science, Commerce leh Economics lamah pawh zirna chhunzawm turin Mathematics thiam a ngai tel tih sawiin, PUC in he Camp pawimawh tak a buatsaih chu tha a tih thu thu leh Camp neih atangin Zirlai ten Mathematics-ah phurna thar an neih ngei a beisei thu a sawi bawk.

Mathematical Olympiad Exposure Camp-ah hian sikul hrang hrang 16 atangin pawl 9, 10 leh 11 zirlai 90 lai an tel a. He camp hi Mizo naupang ten mathematics zirnaah hma an sawn theih nan leh State dangte ruala ke an pen ve theihna atana ruahman a ni a. National Level leh International Level Mathematics Olympiad-ah Mizo naupang an tel tam theih nan buatsaih a ni tih Prof. LP. Lalduhawma Head Department of Applied Mathematics and Statistics chuan a sawi bawk.