KVK North Vanlaiphai-ah Bawrhsap in Solar Cold Storage bun thar a hawng

Serchhip District Bawrhsap Paul L. Khuma chuan nimin khan Krishi Vigyan Kendra (KVK) Serchhip District North Vanlaiphai-ah thlai vawnthatna tur, Solar Cold Storage a hawng a, North Vanlaiphai-a Entrepreneur ten an thil siamchhuah hrang hrang an phochhuah te chu a tlawh nghal bawk.

KVK Serchhip District, N.Vanlaiphai-a Solar Cold Storage hawnna inkhâwm-ah hian Bawrhsap Paul L. Khuma chuan Cold Storage pawimawh zia leh neih a harsat zia te sawiin, hetiang khawl tha tak an chhawr theih tura hawn a ni ta chu North Vanlaiphai mipuite an vanneih thu leh East Lungdar leh North Vanlaiphai te chu thei leh thlai tharchhuak thei tura theihna nei tha an nih thu a sawi a, hei vang hian kawng tam takah hmasawnna kalpui theih a nih thu a sawi a. Thlai tharchhuakte chu return of investment ngai pawimawh tura chahin, “Kan sum sen ai kan sum hmuh a sang zawk lo anih chuan awmze awm lo a sum hmanna a ni tih hriain, kan sum hman aiin a return a that ngei a pawimawh,” a ti a. Kuthnathawktute tana KVK hmalakna hrang hrangte chu lawmawm a tih thu a sawi bawk a ni.

Nimin-a Solar Cold Storage hawnna hun hi KVK Serchhip District-a Senior Scientist & Head Dr. T. Vanlalngurzauva chuan kaihruaiin Dr. Liansangpuii, SMS (Agri.Eng)-in Technical Report pein he Cold Storage hi RKVY - RAFTAR hnuaia atanga an dawn a nih thu a sawi a, Abisag Lalremruatpuii chuan lawmthu sawina hun a hmang bawk a, Bawrhsap hian Cold Storage hi a fang nghal bawk a ni.

Solar Cold Storage hawnna hun hman zawh hian KVK-in an Office-a Stall an buatsaih chu Bawrhsãp hian a fang kual a, heng Stall-ah te hian North Vanlaiphai khaw chhûng Entrepreneur lama product hrang hrang neitu - MF Sunhlu Food Processing, Kim Kim Food Processing Industry, Hnamte Processing, LZ Pachuau, Alfred Sunhlu Food Processing, Women 7 Star leh RF Sunhlu te chuan an thil siamchhuah (product)-chi hrang hrang an phochhuak a ni.

Hemi hnu hian KVK Conference Hall-ah KVK Golden Jubilee lawmna, Krishi Swarna Samriddhi Week pualin entrepreneur te nen inkawmna hun hman chhunzawm a ni a, he hun hi Dr.T.Vanlalngurzauva chuan kaihruaiin kum 5 chhunga KVK hnathawh te sawifiahin presentation a pe a. Bawrhsap baka he hun hmanpuitu SDO (Civil) N. Vanlaiphai Dr. Peter Malsawmtluanga chuan District Bawrhsap in North Vanlaiphai a tlawh chu lawmawm a tih thu leh hetiang programme pawimawh tak mipuite ban phak leh tangkai siam a ni chu lawmawm a tih thu a sawi a, entrepreneur ten harsatna an neih te hotute hnena thlen hreh lo turin a chah a. Entrepreneur ten hma an sawn zel theih nan a theihtawp chhuaha puih a inhuam thu a sawi bawk. He hun hi North Vanlaiphai Village Council Member te pawhin an hmanpui a ni.