‘100 Days TB Campaign’ hawnna Addl. DC hovin Serchhip-ah neih a ni

Ni 100 chhunga TB do beihpui thlakna tur, '100 Days TB Campaign' chu nimin khan neih tan niin Serchhip District-ah pawh he Campaign hi Addl. DC Lalrinzuala chuan a hawng a, “100 Days TB Campaign Programme pawimawh tak hi hriselna lama thawktute chauh nilo District mipuite nen tngrual a kalpui a tul a ni,” a ti.
Serchhip Kawnpui VC Hall-a he Campaign hawnna hunah hian Addl. DC Lalrinzuala chuan he huna kalkhawm VC leh NGO te chu TB dona kawngah thawhhopui atan sawmin, he programme pudarh leh tlangaupui tam turin thalai te pawh a sawm a. Natna hrang hrang tam tak zingah TB natna vei leh enkawl laite tan chauh sawrkarin tanpuina a pe tih sawiin, “Hei hian sawrkarin TB natna a ngaih pawimawhzia a tilang a ni,” a ti a. “Serchhip District-in hma kan sawn a, kan hrisel deuh deuh theih nan TB Campaign Programme hi i ngai pawimawh ang u,” tiin he hunah hian Addl. DC hi TB vei enkawl lai ten chaw tha an lo hmuh theihna turin Niskhay Mitra-ah a inziaklut nghal a. Ni 100 chhunga Serchhip District chhung khaw hrang hranga TB natna vei te dapchhuah hna thawka zin kual tur‘Mobile Medical Unit Vehicle’ chu a vailiam (Flag-off) nghal bawk a ni.

Nimin-a he hun hman hi Serchhip-a Sr. CMO Dr. LP. Malsawma chuan kaihruaiin Serchhip District TB Officer Dr. Lallawmkimi Chhakchhuak chuan powerpoint presentation hmangin 100 Days TB Campaign awmzia a sawifiah a. District Medical Superintendent Dr. ZD. Lalmuanawma kaihhruaina in TB laka fihlim tura intiamna, TB Harega, Desh Jeetega Pledge sawirual niin TB Champion leh Nikshay Mitra - Donor te hnenah thilpek hlan a ni bawk.

March 24, 2025-a ‘World TB Day’ lo thleng leh tur denchhenin ‘100 Days TB Campaign Programme’ hi sawrkar laipui ruahman anga kalpui a ni a. December ni 7 khan National Level-ah a hawnna neiin he Programme hi Mizoram-ah chuan Serchhip District bakah District dang 3- Aizawl, Champhai leh Mamit District-ah te kalpui tura ruahman a ni a. 100 Days TB Campaign Programme in a tum ber chu TB vei a tam thei ang ber hmuhchhuah leh enkawlna pek niin he Campaign hian TB natna kai awlsam bik heng - Kum upa, Diabetis, Alcoholic, Smoker leh HIV Positive te a bitum bik a. He Programme hnuaia hmuchhuah TB veite enkawlna senso pawh a thlawna pek a ni dawn a ni. Kum 2025 ah chuan India ram chu TB natna awm tawh lohna, TB Free India-a lo nih theihna tura mi zawng zawng hrilhhriat te, TB Damdawi ei that pawimawhzia inhrilhriat te chu he programme thil tum zingah a tel a. Nikshay Mitra hnuaiah TB vei enkawl lai a mamawh zual ten chawtha an hmuh theih nan mi inphalte hnen atangin Donation kalpui a ni bawk.