International Paragliding Accuracy Championship 2024 leh Air Sports Festival neih tan a ni
International Paragliding Accuracy Championship 2024 bul tanna hun hi nimin khan Bawngchawm Tlang-a Pilot te thlawhchhuahna hmun, ‘Take off Point’ ah neiin he Championship-a Organising Committee Chairman leh District Bawrhsap Paul L. Khuma chuan a hmanpui a. Bawrhsap chuan Mizoram Chief Minister Lalduhoma thahnemngaih vang te, Mizoram Sawrkar leh Mizoram Aero Sports Association (MASA) te hmalakna avanga International Event Serchhip in a thleng chu lawmawm a tih thu a sawi a. Ram hrang hrang atanga Pilot lo kal khawmte hun hlimawm tak hmang tura duhsakna hlanin he Championship hi a hawng a. Hemi hnu hian he intihsiakna a tel tur Mizo Pilot pathum te chu Bawrhsap hian a vailiam nghal bawk a ni.
Tun tuma International Paragliding Accuracy Championship 2024-ah hian FAI kaltlangin mi 79 inziaklut awmin harsatna hrang hrang avanga India ram rawn thleng thei lo an awm a, hei vang hian a tak takah chuan mi 30 an tel thei a, an zingah hian India ram atangin 17 telin an zinga mi 8 te chu Mizoram atanga tel an ni a, Mizoram atanga tel zingah hian Serchhip District atanga tel mi pathum an awm bawk a, heng te hi Serchhip khua mi pahnih leh Thenzawl mi pakhat te an ni. Heng bakah hian South Korea, Nepal, Kazakhstan, Spain leh Indonesia atangin pilot an tel bawk a. Heng Pilot te hian vawi 12 thlawkchhuak tura ruahman in Zawlpui-a Landing Site-ah an tum leh anga, heta tang hian point pein a tawp-ah a titha te hnenah lawmman sem tura ruahman a ni.
International Paragliding Accuracy Championship and Air Sport Festival neih tur hi mipui a duh apiangte tana chhim theih niin hemi hun chhung hian Zawlpui-ah Stall chi hrang hrang hawn niin mipui a duh apiang tan ei leh in tur, thei leh thlai, Sangha man thar, Serchhip District chhunga an thil siam chhuah chi hrang hrang lei tur a awm a. Nghakuai chiah runpui neih ni bawkin a duh tan Sangha man theihna ruahman a ni bawk a. Hei bakah hian a duh apiangte chuan theihna tura Hot Air Baloon chu ruahman a ni bawk.
Ruahman lawk ang chuan he intihsiakna a tel tura ram hrang hrang atanga rawn kal te hi tunkar Zirtawpni khian Chief Minister chuan Thenawl-a Golf Course-ah zanriah a buatsaih sak anga, a tuk December 14, 2024-ah a kharna hun chu Zawlpui phai-a Landing Site-ah neiin Chief Minister hian a hmanpui anga, hemi hnu hian MZI Hqrs. Serchhip te bultumin ‘Open Air Concert’ neih chhunzawm tur a ni bawk ang.
Comments
Post a Comment