Nov. 18 hmaa Tribal Scholarship sem phut

Mizo Zirlai Pawl (MZP) chuan Mizoram sawrkar in Tribal Scholarship tur a dawn tawh chu November 18, 2024 ralhma ngeia semchhuah an phut thu an sawi.

MZP General Hqrs. hian nimin khan Executive Committee Meeting vawi 637-na neiin Tribal Scholarship 2nd Installment tun thlenga la sem loh chungchang a ngaihtuah a. Mizoram sawrkar-in Scholarship tur October ni 16-a a dawn tawh, tun thlenga sem la ni lo chu pawi an tih thu sawin, Zirlaite mamawhna hriaiin November 18, 2024 (Thawhtanni) ralhma ngei a sem a nih loh chuan na zawk a hmalak an rel a, thuneitu te’n zirlaite harsatna hriatthiampuia a rang thei ang ber a sem vat turin thuneitute an ngen thu an sawi bawk a ni.

Nimin-a MZP thukhawm hian kumin September thlaa MZP Assembly vawi 68-na in thu an rel hrang hrangte bawhzui dan tur pawh an ruahman bawk a. Zo hnam inkhawmpui lian, Zofest 2024 chu kumin December 3-6 chhung khian West Phaileng-a neh tur niin Thupui atan ‘Hrui khat vuanin’ tih chu hman a ni dawn a, Zofa hnam chi peng hrang hrang ziarang leh nunphungte lantirna hun leh thupui hmanga Zofate inpumkhatna tur sawiho a ni dawn a. Mizoram bakah Manipur, Assam, Tripura, Bangladesh leh Buarma atangin palai tel tura beisei niin Zofa hmun hrang hrang a awmte he hun hmang tur hian an sawm nghal bawk a ni.