Thirsakawr-a India ram fangtu in lawmthu sawi

Thirsakawr hmanga India ram fangchhuaktu Vanlallawmzuala Varte chuan hnamdangte zinga Mizoram hmelhriattir theihna hun a nei chu a lawmawm a tih thu a sawi.

Nimin-a Aizawl Press Club-a thuthar thehdarhtute a kawmnaah ‘Ride to clean air’ tih thupui hmanga India ram fangtu Vanlallawmzuala Varte chuan a kalna hmun hrang hrang, India ram hnam hrang hrang mite zingah Mizoram chanchin leh Mizote chanchin a sawi tam thei hle tih sawiin, a kalnaah missionary-te a belh tlat thu a sawi a, hei hian kawng tam taka harsatna a tawhna tur ata pawh a puih thu sawiin, Central Service lama Mizo awmte avanga leng tak leh tlangnel taka a kal kual theih thu a sawi bawk.

Vanlallawmzuala Varte hian January ni 25, 2024 khan Aizawl chhuahsain ‘Ride to clean air’ tih thupuia hmangin Mizoram State Pollution Control Board sponsor-in India ram a fang a, November ni 5 khan Aizawl thleng lehin ni 286 chhungin 17,043.10km-a thui a tlân a ni.

Mizoram Pollution Control Board (MPCB) bultumin niminpiah khan Vanlallawmzuala Varte lawmpuina leh chawimawina hun hi hman a ni bawk a, he hunah hian Forest Minister Lalthansanga chuan LZa hnênah hian Thangchhuah Diar hlanin MPCB Member Secretary C. Lalduhawma kaihhruaiin zawhna leh chhânna hun hman a ni bawk.