PUC in khawchuam atan Sailam khua hawnna nei

Pachhunga University College (PUC), Aizawl chuan thingtlang khawchuam (adopt) an neih thin atan Sailam an thlang a, nimin khan a hawnna hun hmangin Higher & Technical Education Minister Dr. Vanlalthlana chuan khuallian niin a hmanpui a, he hmalakna hnuaiah hian PUC chuan 2024-2026 chhungin Sailam khua hi khalhin College Department hrang hrang ten an zirchiang ang a, kawng hrang hrangin an pui dawn bawk a ni. Sailam khua hi Aibawk RD Block, Aizawl District-a awm niin chhungkaw 179 an awm mek a, Mizo lal hmingthang Bengkhuaia khua thin a nih bakah a khuaa mite hian Sava humhalha, Bird Sanctuary an siam avangin hriat leh ngaihhlut a hlawh hle a ni. 

PUC hian kum 2012 atangin khawchuam (adopted village) hi a lo kalpui tawh a, hemi atan hian zirtirtu ten pawisa thawhkhawmin chumi hmang chuan kawng hrang hranga zirchianna an kalpui bakah a khaw mite kawng hrang hrangin an tanpui thin a, lehkhathiam thei deuh tana PUC-a zir zawm dan an ruahman bakah zirlai leh upa lam tan Aizawl a zirna kaihhnawih hmun pawimawh tlawhte leh thildangte an an ruahman sak thin bawk. Sailam khua hi PUC adopted Village pangana niin a hmain Phulpui, Lungleng I, Dulte leh Khawrihnim te PUC hian a lo adopt tawh bawk a ni.