Japan-a hna hmu Mizo thalai te Visa hlan

Mizoram Youth Commission Chairman Malsawmzuala Ralte chuan Japan-a hnathawk tura kohna hmu mi 34 zinga mipa pathum leh hmeichhe pali te hnenah Japan kalna tur VISA chu niminpiah khan a hlan.

Govt. Hrangbana College Career & Placement Cell, North Easterns Educational Consultancy leh Veda School of Learning-te thawhhona kaltlanga Japan a hnathawk tura Job Offer hmu Visa hlannaah hian MYC Chairman Malsawmzuala chuan Japan kal tum thalai te chu fuihin, tumruhna neia an tan tlat chuan tuna Japan rama kal tur te angin an hun tha a la thleng ve thuai dawn a, dawhtheihna leh tumruhna nei turin a fuih a, Mizo thalaite chu ramdangah chhuanawm tak leh ram hmel lanna an nih ang taka taihmakna leh tumruhna chhawm nung zel turin a chah bawk.

Hrangbana College Career & Placement Cell, NEEC leh Veda School of Learning-te chuan, India Sawrkar leh Japan Sawrkar-in thawhhona thuthlung an lo ziah tawh angin nikum November thla atanga tan khan Japanese tawng zirna an lo buatsaih tawh a. Heta zirlaite hi Japan rama Company te zinga hnathawk tur mamawhte chuan interview kaltlanga rawn thlang chhuakin Japan atangin an hna tur an rawn pe thin a ni.

NEEC hian December 2015 leh January 2017 khan Mizo thalai 40 chuang Mizoram Sawrkar puihna in an lo tir tawh a. Tunah hian chung thalai rual te chuan Japan ramah hlawhtling takin hna an thawk mek a ni.