Sports Minister-ah thlen

Sports & Youth Services Minister Lalnghing-lova Hmar chuan nimin khan Ministry of Youth Affairs & Sports changtu Minister Dr. Mansukh Mandaviya hmuin Mizoram mamawh hrang hrang a thlen.

New Delhi-a Union Minister Office-a an inkawmna ah hian Mizoram Sports Minister Lalnghinglova Hmar chuan, India ramin Olympic Games 2036 thlen a tum chungchangah Mizoram atanga infiammite an tel ve ngei a duh thu a sawi a. Hemi inbuatsaihna atan hian  Mizoram Sports Conclave pawh  June 13-14, 2024 khan hlawhtling taka buatsaih a nih tawh thu leh Sawrkar Flagship Scheme, Bana Kaih (Handholding) hnuaiah Mizorama Sports Coaching liantham bultanna tur ruahman a nih thu a sawi bawk a. Mizoram chu State lian lo tak a ni a, Sports Budget pawh duh angin a tam thei lo a, Sports-a Mizoram hma-chhawpte hlawhtlinna’n Sawrkar laipui puihna a mamawh thu a sawi a. Sawrkar tha chakna belh-chhah turin Corporate leh PSU hrang hrangte pawh dawr kual mek a nih thu a hrilh bawk.

Union Sports Minister Dr. Mansukh Mandaviya chuan Mizoram Sports Minister hma-thlir leh Mizoram Sawrkarin hma a lo lak tawhna te chu fakawm a tih thu a sawi a. Pawisa dil tur ringawt ni lo, Vision mumal tak nei chunga mamawh a thlen thin chu lawmawm a tih thu Mizoram Sports Minister hi a lo hrilh a, Sports infrastructure leh thildang a tulna apiangah a puih tur thu pawh a sawi bawk a ni. Union Minister chuan State hrang hranga Sports Minister te leh PSU te Joint Meeting neihpui a tum hnai tih a sawi a. State-a sports department leh PSU te awmze nei zawka thawhho theih dan tur, One State-One PSU model buaipui mek a nih thu a lo hrilh bawk a ni.

LESDE changtu Minister ni bawk Lalnghinglova Hmar chuan Sumita Dawra, Secretary to Govt. of India, Ministry of Labour & Employment pawh kawm nghalin Mizoram mamawh hrang hrang an sawidun nghal a ni.