Sinlung Hills Council Inthlanpui-ah MNF an chak; New Vervek Bial-ah Vote tla chhiar nawn a ni

Seat 12 awmna Sinlung Hills Council Inthlanpui neih zawh takah MNF leh an thawhpui HPC (R) te chuan sawrkar siam thei khawpin hnehna an chang a. New Vervek Bial-a Vote tla te chu sawiselna a awm avangin nimin tlai khan Aizawl-ah chhiar that leh niin ZPM Candidate chu tling-ah puan a ni.

Niminpiah a Sinlung Hills Council Inthlanpui vawi 2-na neiha Vote tla te hi nizan hmasa khan chhiar nghal a ni a, nizan hmasa vek khan Bial 11 result chu hriat nghal niin New Vervek Bial erawh result-ah sawiselna a awm avangin result hi hriat mai theih a ni lo a, result hriat chinah MNF leh an thawhpui HPC (R) te hian seat awm zawng zawng zatve aia tam, Seat 7 lain hnehna an chang a, ZPM leh HPC tangdun chuan Seat 3 lain Congress Party chuan Seat pakhat an la ve bawk a ni. MNF Party hi Party mal-a Seat la tam ber niin Vanbawng, Ratu, Zohmun, Tinghmun leh Saiphai-ah te hnehna an chang a, an thawhpui HPC (R) hian Independent-a dingin Sakawrdai North leh Sakawrdai South-ah hnehna an chang bawk a, ZPM Party hian Phuaibuang, Suangpuilawn leh Saipum-ah te hnehna chang ve thungin Congress Party hian Khawlian-ah hnehna an chang ve bawk a ni.

Hetihlai hian New Vervek Constituency-a Vote tla chhiar-ah erawh thil fello a awm nia sawi a nih avangin State Election Commission chuan hma a la nghal a, State Election Commissioner Dr. H. Lalthlangliana chuan New Vervek Bial-a Vote tla result chhiar chungchangah thil felhleh a awm ngei niin a lang tih sawiin, New Vervek Bial Returning Officer thu leh hla an lak phawt a ngaih thu leh New Vervek khawtlang, VC leh Party ten inthlan that an duh a, Complain pawh an dawn tawh thu a sawi bawk a. State Election Commission chuan hemi chungchang hi nimin khan ngaihtuah nghalin, Complain bakah District Election Officer (DEO) leh Observer report atanga a lan danin inthlan vote thlak chungchangah lungawilohna sawi tur a awm lova, Vote erawh Election Observer telin, DEO kaihhruaina hnuaiah chhiar that nise tiin thutlukna an siam a ni a. Complain thehluttu te hi New Vervek VCP leh Secretary bakah MNF Unit President te an ni a, heng mite hian vote chhiar chungchang ringawt an sawisel avangin vote thlak that tul an ti lo a, chhiar that a, a chhiar tute pawh mithar vek dahin Party Agent te pawh tel tura tih an ni bawk.

New Vervek Bial-a Vote tla te nizan-a chhiar nawn ah hian ZPM Candidate Lalhlun-chhunga chuan Vote 396 hmuin thlantlin a ni a, amah hnaih bertu MNF Candidate C. Lalnun-tlanga chuan Vote 384 a hmu bawk a. Heti hian Seat 12 awmna Sinlung Hills Council Inthlanpui vawi 2-na neih zawh takah hian MNF leh HPC (R) tangdun chuan seat 7 lain ZPM in Seat 4 an la a, Congress party in Seat khat an la ta bawk a ni.