Party ten lawmthu an sawi

MNF Party chuan nimin khan Aizawl-a Mizo Hnam Run-ah Sinlung Hills Council (SHC) Inthlanpui-a MNF in hnehna an chan avanga Pathian hnena lawmthu sawina hun an hmang a, he hunah hian MNF President Zoramthanga chuan, “HPC (R) nena kan thawhhona ah lawmthu sawi theia kan awm hi a lawmawm hle. Inthlan laia rim taka thawktute chungah lawmthu kan sawi,” a ti a. “MNF hi Pathian in min puihna avanga ding chhuak chho a ni a, kum 63-na ah pawh party lian tak niin kan la nung a ni. Vawi hnih khat inthlan hi Pathian ngaih pawimawh ber a ni lo. A changin min dah sang a, a changin min dah hniam thin a ni zawk,” a ti bawk.

ZPM Party pawhin nimin khan thuchhuah siamin Sinlung Hills Council General Election neih zawh takah Sinlung Hills Area mipuiten bial engemaw zatah ZPM leh HPC thawkdunte duhsak taka hnehna an pe chu lawmawm an tih thu an sawi a. Bial hrang hranga hnehna changtute chu an lawmpui thu leh Council mipuite tana thahnem ngai taka thawk turin duhsakna an hlan a. “Hmar tlangdung hmasawnna turin ZPM Party leh Ministry chuan theihtawp a chhuah zel dawn a, tun dinhmunah Council bial zawng zawngah politics harhtharna la thleng rih lo mahse, a tahtawl leh hmatiam zela Kalphungthar mipui Sawrkar a din chhoh zel kan beisei,” tiina, chutiang tur chuan  hmar tlangdung mipuite tan hma an la zel dawn tih an sawi bawk.

Mizoram Pradesh Congress Committee (MPCC) President Lal Thanzara pawhin Sinlung Hills Council Inthlanpui-ah an beisei ang result nei phak lo mah se an party in hmasawnna nasa tak an nei chu a lawmawm takzet tih a sawi a. Congress party in mal din chunga Bial hrang hranga Congress Candidate te vote hmuh ah kum 2023 MLA election aia hmasawnna nasa tak lo lang chu a lawmawm hle tih sawiin, SHC-a MNF sawrkar thar tur a lawmpui thu a sawi bawk.