Serchhip District-ah Vawk thi leh suat 10,532 tling tawh
AH&Vety Department ten an chhinchhiahna atanga a lan danin kumin chhunga Serchhip District-a African Swine Fever (ASF) hri leng hi khaw 31-a chhungkaw 2119 ten an tuar tawh a, Vawk hri leng avang hian Vawk 3490 thi tawhin Vawk 7042 suat a ni tawh bawk a, ASF avanga kumin a Vawk thi leh suat hi 10,532 a tling tawh a ni. Serchhip District-a ASF vanga Vawk thi tamna ber chu Thenzawl niin kumin hian Vawk 1059 a thi tawh a, North Vanlaiphai-ah Vawk 335 thi tawhin Baktawng-ah 254 a thi tawh bawk a ni. ASF avanga Vawk suat tamna ber Chhingchhip khua ah Vawk 1304 suat a ni tawh bawk a, Chhunthar Tlangnuam-ah Vawk 730 suat ni tawhin Khaw-lailung-ah Vawk 560 suat a ni tawh bawk a ni.
Serchhip Town chhunga VC Area hrang hrangah kumin chhung hian ASF vanga Vawk thi 966 chhinchhiah a ni tawh bawk a, Vawk 1914 suat a ni tawh bawk a ni.
Kumin a ASF hri leng hian ziaawm lam a pan ve hret hret zel niin a lang a, Inrinni khan Baktawng khua ah Vawk thi pakhat chhinchhiah leh niin Chhuanthar Tlangnuam-ah vawk 4 suat a ni bawk a, nimin lamah Vawk thi leh suat hi chhinchhiah belh a awm lo thung a ni.
Comments
Post a Comment