Chhiahtlang Kawn Veng-ah ruihhlo do bul tan a ni

Chhiahtlang khua a Kawn Veng Welfare leh All NGO huaihawtin Ruihhlo Do Beihpui thlakna chu Inrinni khan neih tan a ni a, he huna kalkhawm te chuan Zu leh ruihhlo zawrh an duh lohzia an lantir a ni.
Chhiahtlang Bazar Kawt-a Ruihhlo Do beihpui thlakna hun hi Kawn Veng Welfare Committee (KWC) Chairman R. Lalremchhunga chuan kaihruaiin Pastor C. Lalsanglura leh Chhiahtlang South VCP K. Lalbiakmawia ten thu an sawi a, tuna an hmalakna chu a bultanna a nih thu leh Vengchhung a zu leh ruihhlo zuar lui zel an awm chuan na zawka hmalak chhoh zel an tum thu an sawi bawk a ni.

He huna kalkhawmte hian ruihhlo dona thuziak hrang hrang kengin KWC Vice Chairman R. Lalchhuanliana kaihhruaina hnuaiah Khawtlang tihnawktu Zu leh ruihhlo zuar thin ten sim a zuar tawh lo tura an duh thu te; Zu leh ruihhlo an do zel dawn thu te, khawtlang ngenna zahlo chuan vengchhung chhuahsan tura an duh thu te, ram leh hnam hmelma zu leh ruihhlo zuar an mamawh loh thute leh Sawrkar phalloh zuartute chu na taka hrem an phut thu te hmangin an aurual bawk a ni.