SBM-G hmalakna thlirho a ni

North East State-a Swatchh Bharat Mission-Grameen (SBM-G) hnuaia hmalakna te thlirhona hun chu nimin khan Guwahati-ah neih a ni.

Swatchh Bharat Mission-Grameen hnuaia India hmarchhak State hrang hranga hmalakna te thlirletna hunah hian hnathawh dan leh hmalakna te thlirho a ni a; hmarchhak State-ah Mizoram sawrkar chu a ti tha pawl ni mahse, hmasawnna tur tam tak a la neih thute he hunah hian tarlan a ni a. Heng hmasawn an ngaihna zawnahte hian Mizoram atanga tel PHE Minister Prof. Lalnilawma chuan nasa zawka Mizoram in tanlak a tum thu leh amah ngei pawhin Department-te nasa zawka lo enpui a tum thu a sawi a ni.

He hun hmanpuitu Union Jal Shakti Minister CR. Patil chuan North East State te'n harsatna hrang hrang karah theihtawp chhuaha faina leh thianghlimna kawnga hma an la leh hemi rahchhuah tha tak hmuh a ni chu lawmawm a tih thu a sawi a. Individual Household Toilet (IHHT) dilna te ni 30 chhunga buaipui hman tur leh tuna la khaihlak mekte chu ni 15 chhunga zo hman tura kalkhawmte chahin, March 2025-ah chuan 'Sampoorna Swachhata' dinhmun thleng hman tura tan la turin a chah a, thla tina District Water and Sanitation Mission (DWSM) thutkhawm nei turin a chah bawk.

He huna tarlan a nih danin North East State-ah thingtlang khua za zela 51 te chuan ODF Plus Model dinhmun an thleng tawh a. ODF Model Status-ah Sikkim titha berin 100% dinhmun a thleng a, Mizoram chuan dawtin 86% ODF Plus Model a thleng tawh bawk a ni. Meeting chuan Sustainable Solid and Liquid Waste Management, Community Sanitary Complex, Plastic Waste Management leh Faecal Sludge Management hmalakna kawnga ngaihven tulte bakah Fund hman dan leh hmanna chunchang bawhzui dan leh pawimawh dangte an sawiho a ni.