AH&Vety Department in Ban-a kaih kalpui mek

Sawrkar Flagship programme, 'Hand Holding Scheme' hnuaia AH & Vety Department kaltlanga Pilot Phase hmalaknate chu nimin khan AH&Vety Minister C. Lalsawivunga hovin sawiho a ni.

He sawihona hunah hian AH&Vety Minister chuan Hand Holding Scheme tihlawhtling tura Vety Department-in chak taka hma a la chu lawmawm a tih thu sawiin, thawktute chu a tul anga hma la chhunzawm zel turin a fuih a. Dr. Robert Rualthankhuma, Nodal Officer, Hand Holding Scheme, AH & Vety Department hnen atangin hamthatna dawngtu (Progress Partner) thlan kawnga Search Team-te zirchianna report ngaihthlak niin Hand holding Scheme kalpui kawnga pawimawhte sawiho a ni bawk.

Pilot Phase atana District AH & Vety Officer te'n an thlanchhuah te chu November ni 5-8, 2024 chhung khan Search Team te'n hmun thum-ah inthenin Mizoram District hrang hranga Hand Holding Scheme hnuaia tanpuina diltute chu an chenna In-ah an kalchilh a, an Farm dinhmunte an enpuiin an kawm nghal zel a ni.

AH & Vety Department hnuaia Hand Holding Scheme Pilot Phase atan hian diltu engemawzat zinga mi 67; Ar vulh 19, Kel vulh 8, Vawk vulh 30, Bawng vulh 6, Ran chaw siamna 2 bakah sa leh bawnghnute sawngbawlna lam siam diltu 2 te District hrang hrang atangin Pilot Project atan thlanchhuah an ni a, hemi atana Loan senso ngai tur zat chu cheng nuai 1700 chuang a ni a. Pilot phase atana thlanchhuahte hi Planning & Programme Implementation Department-ah Apex Body-in an enfel leh tura thehluh a ni ang.