Ruihhlo hrang hrangte'n thalai leh zirlaite nun a luhchilh leh a tibuai pawi a tih thu Larsap in a sawi

Mizoram Governor Dr. Hari Babu Kambhampati chuan Mizoram chu hmun ralmuang tak niin hmasawnna tehfung hrang hrangah te pawh titha thin viau mah ila, ruihhlo leh a kaihhnawih hrang hrangte'n thalai leh zirlaite nun thuk taka a luhchilh leh a chimbuai chu pawi a tih thu a sawi.

Brahma Kumaris Mizoram kaltlanga ruihhlo do hmalakna kalpui tur, 'Nasha Mukh Bharat Abhiyaan (NMBA)' hawnna nimin-a Raj Bhavan Durbar Hall-a neih ah Governor Dr. Hari Babu Kambhampati chuan he thu hi a sawi a, Ruihhlo do kaihhnawiha hmalatu Sawrkar, Kohhran leh NGO, abikin YMA te'n hmalakna an kalpui mek chu lawmawm a tih thu leh hei aia lian zawk leh awmze nei zawka tang hova hmalak a tul takzet tih a sawi a, Brahma Kumaris-te chu ruihhlo do beihpui kalpui mek atana tha tichaktu pawimawh tak an nih ngei a beisei thu a sawi a ni.

Governor Dr. Hari Babu Kambhampati chuan Brahma Kumaris-te chu rinna leh ngaihtuahna sawrbingna lam thupui-a neia hma la thin tia hriat an nih thu leh nundan hrisel chawilara a taka an nunpui thin chuan an tumruhna leh inthunun theihna a nemnghet a ni, a ti a. Mizoram mipuite chu ruihhlo do hmalakna kawnga hmanraw hrang hrangte tangkai zawka hman thiam tum turin a chah a. Zirlaite chu ruihhlo laka fihlim tum tur leh a that lohnate midang zirtir turin a chah a. Ruihhlo do kawnga hmalatu zawng zawngte pawh tha thlah lova phur taka theihtawp chhuah zel turin a fuih nghal bawk.

He hunah hian Brahma Kumaris, Aizawl-a Centre Incharge Rajyogini BK Narmada chuan inlawmna thu sawiin, Rajyogi Dr. Banarsil Sah, Secretary, Medical Wing, Brahma Kumaris, Mount Abu, Rajatshan hnen atangin an pawl hmalakna leh Nasha Mukh Bharat Abhiyaan thil tum tlangpui ngaihthlak a ni a. Dr. Swapan Gupta, Associate Professor of Neurology, GB Pant Institute, New Delhi-in ruihhlo khawih avanga harsatna thleng theite leh ruihhlo do kawnga pawimawhte a sawifiah hnuah BK Vedhatri, Sr. Faculty, Brahma Kumaris, Delhi kaihhruaiin rilru sawizawina hun hman a ni a, ruihhlo laka Mizoram a fihlim theih nan thutiam lak a ni bawk.

Ruihhlo leh a kaihhnawih awm lohna rama India siam tura hmalakna, Nasha Mukt Bharat Abhiyaan hi August ni 15, 2020 khan Sawrkar laipui Ministry of Social Justice and Empowerment chuan a tlangzarh a. Ruihhlo in nghawng tha lo a neihte zau zawka inzirtirna kalpui chu a tum bulpui ber a ni. March ni 4, 2023 khan hemi chungchang ah hian Ministry of Social Justice and Empowerment leh Brahma Kumaris-te chuan zirlai, hmeichhia leh thalaite zinga ruihhlo do hmalakna nei turin thawhdunna thuthlung an ziak a ni.