Kristian Hla Bu App siam thar tlangzarh a ni

Mizoram Synod-a Worship Committee hmalaknaa Kristian Hla Bu App siam chu Synod Moderator Rev. R. Vanlalnghaka chuan tunkar Nilaini khan a tlangzarh.

Kristian Hla Bu App hi Lailen Consulting Pvt. Ltd. te siam niin kum 2021 Synod Inkhawmpuiin siam ni se tia a pawm tawh anga hmalakna a ni a. Kristian Hlabu App-ah hian Kristian Hla Bua hla 600 dahluh a ni a, instrument hrang hrang ri thlan theih niin, part hrang hrang (Soprano, Alto, Tenor, Bass)-in a rik tir theih a, part mal chauh emaw, part thlan bik ri te pawha tih rik theih a ni bawk. Heng bakah hian a tempo (hla vuak ran zawng), a transpose (key tihsan leh tihhniam) te a tih theih bawk a ni.

Kristian Hla Bu Mobile App hi Android leh iOS Phone a hman theih tura duan a ni a, App hi kristianhlabu.com emaw Google Playstore-ah leh Apple App Store atanga download theih a ni.

App hi phone atanga install hian hman hmasak berah hla hi a in download, a hnu lamah erawh internet tel lo pawhin app hi a hman theih dawn a ni. App hi tihchangtlun chhoh zel tur a ni a, a siamtu Lailen te hian research ti paha an siam thu leh he Software/App hian hla hi Staff Notation atangin Tonic Solfa-ah a let a, hetiang thei hi a hmasa ber a nih thu an sawi bawk.