Raltlan sing thum chuang awm

Myanmar ram buai avanga an sahimna zawnga Mizoram-a lo lut raltlan mi 33,000 chuang chhinchhiah an awm mek. Report hnuhnung berin a tarlan danin, Mizoram pumah Burma atanga raltlan mi 33,712 awmin heng zinga 10,119 te chu mipa niin hmeichhia 10,782 an awm bawk a, raltlan thenkhat chuan an rama lét leh duh viau mah se ram a buai avangin tun dinhmunah lét thei an ni rih lo tih an sawi a; chutih rualin Mizo-ram-ah in hlawhna tur te a awm mai loh avangin ei bar zawn kawng bakah an fa te sikul kalna tur leh an mamawh phuhruk sak kawngah harsatna an tawk nasa ve hle tih an sawi a ni. Mizoram-ah Burma atanga raltlan zingah naupang kum 18 hnuailam chhinchhiah mi 12,811 an awm mek a. Raltlan awm tamna ber chu Champhai District niin mi 13,966 awmin, heng zinga 5232 chu naupang an ni a, raltlan zinga naupangte hi an remchan anga School kaltir niin an tam deuhna ah chuan an Camp-ah te zirna an kalpui a ni.